Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 192 Hüküm no: 202 Orijinal metin no: [39b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yorgi’nin sebzeci dükkânında sattığı sebzelerin parasını alarak kaçtığı ve paranın kefîllerinden tahsil edildiği Mahmiye-i Galata sâkinlerinden Nekite v. Yani nâm zimmî meclis-i şer‘-i şerîfde işbu bâ‘iseyi’l-kitâb Rizo v. Yorgi ve Nikola v. Dimo nâm zimmîler muvâcehelerinde ikrâr ve takrîr-i kelâm edip bundan akdem mahmiye-i mezbûrede Frenk kilisesi kurbunda vâki‘ icâre-i sahîha-i şer‘iyye ile tasarrufumda olan bir bâb sebzehâne dükkânında müste’cirim olup Küçük Badracık sâkinlerinden Yorgi v. ( ) nâm zimmînin nefsine ve gaybet ederse üzerine edâsı lâzım olan mala zimmiyân-ı mezbûrân Rizo ve Nikola emr ve kabûlü hâviye kefâlet-i sahîha-i şer‘iyye ile kefîl oldular idi hâlâ dükkânıma bey‘ olunmak için bin seksen akçe kıymetli beylik sebzevât bırakdıklarında merkūm Yorgi dahi zikr olunan sebzevâtı bey‘ edip semenini alıp firâr eylemeğin meblağ-ı mezbûru mîrî için benden ahz u kabz ettikleri ecilden ben dahi meblağ-ı mezbûr bin seksen akçeyi merkūm Yorgi’nin kefîlleri olan merkūmân Rizo ve Nikola’dan ahz u kabz eyledim dedikde mukırr-ı mezbûrun ber vech-i mübeyyen cârî ve sâdır olan ikrâr ve takrîrini el-mukarru lehüma’l-mezbûrân bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ gıbbe’t-taleb ketb olundu. Tahrîren fi’l-yevmi’l-âşir min Cumâdelûlâ li sene erba‘a ve hamsîn ve elf. Şuhûdü’l-hâl: İsmail Kethüdâ b. ( ), Abbas Kethüdâ, Terekeci-i mîrî mal, Zülfikār Bey, Hüsrev Beşe b. Kurd, Yani v. Yorgi, Nikola v. Pavli, Dimo Bostânî, Kosta v. ( ), Dimo v. Nikola, Yorgi v. Nikola