Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 192 Hüküm no: 203 Orijinal metin no: [39b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed b. Abdullah’ın vefât eden Hamal Hasan b. Kenan’da kalan alacağını yetimlerinin vasîsi olan kardeşi Abdi b. Kenan’dan tahsil ettiği Medîne-i Ebâ Eyyûb-i Ensârî -radiye anhu Rabbühü’l-Bârî-’de Takyecibaşı mahallesinde sâkin Mehmed b. Abdullah nâm bakkal meclis-i şer‘-i hatîr-i lâzımü’t-tevkīrde mahalle-i mezbûre sâkinlerinden iken bundan akdem vefât eden Hamal Hasan b. Kenan’ın karındaşı olup evlâd-ı sıgārına kıbel-i şer‘den mansûb vasîsi olup muhallefâtına bi-hasebi’l-vesâye vâzı‘ü’l-yed olan işbu râfi‘ü’l-kitâb Abdi b. Kenan mahzarında ikrâr ve i‘tirâf edip müteveffâ-yı mezbûr Hasan hâl-i hayâtında ve kemâl-i akl ve sıhhatinde keyli ve vezni ilm-i şer‘î ile ma‘lûm benden iştirâ eylediği arpa ve pirinç ve sâir me’kûlât ve zehâir bahâsından zimmetinde mütekarrir olan yedi bin beş yüz kırk akçe hakkımı ba‘de vefâtihî vasiyy-i mezbûrdan da‘vâ ve taleb eylediğimde inkâr edip şuhûd ve udûl ile müdde‘âyı isbât ettiğimden sonra hâl-i hayâtında meblağ-ı mezbûru müteveffâ-yı mezbûrdan istîfâ ve bir vechile zimmetini ibrâ ve iskāt eylemediğime istihlâf olundukda ben dahi alâ mâ hüve’s-suâl half billâhi’l-aliyyi’l-azîm eylediğimden sonra vasiyy-i merkūm meblağ-ı mezbûru müteveffâ-yı mersûmun muhallefâtından edâsına ilzâm olunmuşdu el-hâletü hâzihî meblağ-ı mezbûr yedi bin beş yüz kırk akçeyi vasiyy-i mersûm yedinden bi’t-tamâm ve’l-kemâl ahz u kabz edip min ba‘d müteveffâ-yı mezbûr Hamal Hasan’ın zimmetinde bir akçe ve bir habbe hakkım bâkī kalmadı dedikde mukırr-ı mezbûrun ber vech-i mübeyyen cârî ve sâdır olan ikrâr ve takrîrini el-mukarru lehü’l-mezbûr bi’l-muvâcehe tasdîk ve bi’l-müşâfehe tahkīk etmeğin mâ hüve’l-vâki‘ alâ vukū‘ihî bi’t-taleb ketb ve imlâ olundu. Hurrire fi’l-yevmi’t-tâsi‘ min Cumâdelûlâ li sene erba‘a ve hamsîn ve elf. Şuhûdü’l-hâl: Mustafa Çelebi b. Abdullah, İbrahim Çelebi b. Ali, Ali Çelebi b. Mehmed, Mustafa Beşe el-Muhtesib, İbrahim Çelebi min huddâm, Mustafa Dede b. Musa ve gayruhüm