Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 193 Hüküm no: 204 Orijinal metin no: [39b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Zamâne Hâtun bt. Abdullah’ın arsasını Hasan b. Abdullah’a sattığı Medîne-i Ebâ Eyyûb-i Ensârî -radiye anhu Rabbühü’l-Bârî-’de Serv mahallesinde sâkine Zamâne Hâtun bt. Abdullah meclis-i şer‘-i hatîr-i lâzımü’t-tevkīrde işbu râfi‘ü’l-kitâb Hasan b. Abdullah nâm kimesne mahzarında bi’t-tav‘ ve’r-rızâ ikrâr ve takrîr-i kelâm edip mahalle-i mezbûrede vâki‘ bir tarafdan Abdi b. ( ) menzili ve bir tarafdan Derviş b. Abdullah menzili ve bir tarafdan tarîk-i hâs ve ba‘zan Mehmed b. Kurd menzili ve bir tarafdan bâyi‘a-i mezbûre Zamâne Hâtun menzili ile mahdûd olup tûlen bennâ zirâ‘ı ile yirmi bir ve arzan yirmi bi-hesâb-ı şatrancî dört yüz yirmi bir zirâ‘ bir kıt‘a mülk arz-ı hâliyeyi cemî‘ tevâbi‘ ve levâhıkı ve kâffe-i menâfi‘ ve merâfıkı ile mezbûr Hasan’a bin beş yüz ceyyid ve cedîd râyic fi’l-vakt akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm edip ol dahi vech-i muharrer üzre iştirâ ve tesellüm ettikden sonra semeni olan mezbûrü’n-na‘t akçeyi yedinden bi’t-tamâm ve’l-kemâl ahz u kabz eyledim ba‘de’l-yevm mârrü’z-zikr arz-ı hâliye cemî‘ tevâbi‘ ve levâhıkı ile mezbûr Hasan’ın müşterâ-yı sahîh ve sarîhidir, keyfe mâ yeşâ’ ve hasbe mâ yürîd mutasarrıf olsun dedikde mukırra-i mezbûrenin ber vech-i mübeyyen cârî ve sâdır olan ikrâr ve takrîrini el-mukarru lehü’l-mezbûr bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olundu. Tahrîren fi’l-yevmi’l-hâdî aşer [min Cumâdelûlâ] li sene erba‘a ve hamsîn ve elf. Şuhûdü’l-hâl: Fahrü’l-eimme Mustafa Efendi, Hüseyin b. Sefer el-Müezzin, Eyüb b. Abbas, Abdi b. …?, Mehmed b. Kurd, Ali Beşe b. Arabacı, Gemici Mehmed b. Abdullah, Mustafa Beşe el-Muhtesib ve gayruhüm mine’l-huzzâr