Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 194 Hüküm no: 205 Orijinal metin no: [40a-1, Arapça] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Haydar Kethüdâ b. Hasan’ın evini Hatice Hâtun’un zevci için kurulan para vakfına bey‘ bi’l-istiğlâl yoluyla sattığı Haydar Kethüdâ b. Hasan nâm kimesne meclis-i şer‘-i şerîfde -Allahü te‘âlâ tağyîr ve tahrîfden korusun- ikrâr ve i‘tirâf edip bu akdin sudûruna değin kendisine âid mülkü olup yedinde ve taht-ı tasarrufunda bulunan medîne-i mezbûrede Kasımpaşa mahallesinde vâki‘ bir tarafdan merhûm el-Hâc Mehmed vakfı ve bir tarafdan el-Hâc Mustafa b. Abdullah mülkü ve bir tarafdan Taşçızâde deyû bilinen Mehmed Bey mülkü ve bir tarafdan tarîk-i âm ile mahdûd olan cemî‘ menzilini bi-cümleti’t-tevâbi‘ ve’l-levâhık ve kâffeti’l-menâfi‘ ve’l-merâfık kadri ve nisâbı yüz elli kıt‘a diyâr-ı Rûmiyye’de râyic riyâlî guruş i‘tibâr olunur harbî sikke ile meskûk kıt‘a-i fıddî semen-i mu‘ayyen-i makbûza hâmil-i hâze’l-kitâb medîne-i Ebâ Eyyûb el-Ensârî -radiye anhu Rabbühü’l-Bârî-’de vâki‘ Hatice Hâtun’un zevci için mevkûfe olan nukūda mütevellî olan Ahmed Ağa b. Ali el-Cündî’ye bey‘ etmeğin ol dahi vakf-ı mezbûr malı ile ondan istiğlâlen iştirâ eyleyip bey‘ ve iştirâ-i sahîhayn-i şer‘iyyeyn eyledikden sonra menzil-i mezbûru ba‘de’t-tahliyye ve’t-tekābuz işbu kitâbın zeylindeki târih-i şehr gurresinden sene-i kâmile tamâmına değin bu müddet için mikdârı on beş kıt‘a mârrü’z-zikr kıt‘aya istîcâr ettikde mütevellî dahi ona îcâr etmeğin îcâr ve istîcâr-ı sarîhayn-i mer‘iyyeyn ikrâr-ı sahîh-i şer‘î ve i‘tirâf-ı sarîh-i mer‘î ile ikrâr ve i‘tirâf etmeğin mütevelli’l-mûmâ-ileyh kıbelinden dahi vicâhen tasdîk olundukdan sonra meblağ-ı mersûmun aslına ve ücret-i merkūme ile menzil-i mesfûrun derkine mukırra-i mezbûrenin zevcesi olan Dilâver Hâtun bt. Abdullah nâm hâtun ile mukırr-ı mezbûrun annesi olan Sultâne Hâtun bt. Memi Şah emr ve kabûlü hâviye kefâlet-i sahîha-i şer‘iyye ile kefîl olmağın [kayd olundu]. Cerâ zâlike ve hurrire fi’l-yevmi’l-âşir min Cumâdelûlâ li sene erba‘a ve hamsîn ve elf. Şuhûdü’l-hâl: Abdurrahman Çelebi b. Habib el-Hammâmî, Davud Halîfe b. Mehmed el-Müezzin, Cafer Beşe b. Abdullah, Hüseyin Beşe b. ( ) el-Hallâc, Ali Beşe b. Mustafa, Osman Beşe b. Abdullah, Mehmed Çelebi b. Kara Ali ve gayruhüm