Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 194 Hüküm no: 206 Orijinal metin no: [40a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yorgi v. Avyori’nin samanlığını Yorgi v. Dimitri’ye sattığı Vilâyet-i Rumeli’nde İnebahtı sancağında vâki‘ Gerbeniş kazâsı müzâfâtından Vereni nâm karyede sâkin Yorgi v. Avyori nâm zimmî meclis-i şer‘-i şerîf-i enver ve mahfil-i dîn-i münîf-i ezherde işbu râfi‘ü’l-kitâb Yorgi v. Dimitri nâm zimmî muvâcehesinde bi’t-tav‘i’s-sâf ikrâr ve takrîr-i kelâm edip karye-i [mez]bûre hâricinde vâki‘ bir tarafdan Franko v. Gono nâm zimmî samanlığı ve bir tarafdan Esteraki v. Saka nâm zimmî samanlığı ve iki tarafdan tarîk-i âm ile mahdûd fevkānî ve tahtânî iki bâb beyti ve havluyu müştemil samanlık ta‘bîr olunur mülkümü cemî‘ tevâbi‘ ve levâhıkı ve kâffe-i menâfi‘ ve merâfıkı ile mezbûr Yorgi’ye iki bin nakd-i ceyyid ve cedîd râyic fi’l-vakt akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm edip ol dahi vech-i muharrer üzre iştirâ ettikden sonra semen-i mezbûrü’n-na‘t iki bin akçeyi mezbûr Yorgi yedinden bi’t-tamâm ve’l-kemâl ahz u kabz eyled[ikde]n sonra sâbıku’z-zikr samanlığı mahallinde kabz ve tesellüme merkūm Yorgi’yi taslît eyledim ba‘de’l-yevm mârrü’z-zikr samanlık mezbûr Yorgi’nin mülk-i müşterâ-yı sahîh ve sarîhidir keyfe mâ yeşâ’ mutasarrıf olsun dedikde mukırr-ı [mez]bûrun ber vech-i mübeyyen câr[î] ve sâ[dı]r olan ikrârını el-mukarru lehü’l-mezbûr bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olundu. Tahrîren fi’l-yevmi’r-râbi‘ aşer min Cumâdelûlâ li sene erba‘a ve hamsîn ve elf. Şuhûdü’l-hâl: Dimitri v. Ragobe, Trandafilo v. Yani, Yani v. Yorgi, Kerice v. İsterice, Panayot v. Yani, Hristodori v. Nikola, Anastas v. Tordi, Rizo v. Dimitri, Dimitri v. İsteradik ve gayruhüm