Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 195 Hüküm no: 207 Orijinal metin no: [40a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Rıdvan b. Abdullah’ın menzilini Hatice Hâtun bt. Mehmed Bey’e sattığı Medîne-i Ebâ Eyyûb-i Ensârî -radiye anhu Rabbühü’l-Bârî- müzâfâtından Terkos nâhiyesine tâbi‘ Tuğluca nâm karyede sâkin Rıdvan b. Abdullah nâm kimesne meclis-i şer‘-i şerîf-i enver ve mahfil-i dîn-i münîf-i ezherde yine karye-i mezbûre sâkinlerinden işbu râfi‘atü’l-kitâb fahrü’l-muhadderât Hatice Hâtun bt. Mehmed Bey tarafından ikrâr-ı âti’z-zikri tasdîke vekîl olup hasm-ı câhid-i şer‘î mahzarında nehc-i şer‘î üzre vekâleti sâbite olan merkūmenin sadrî oğlu fahrü’l-akrân Mehmed Bey b. İbrahim Bey mahzarında bi’t-tav‘i’s-sâf ikrâr ve takrîr-i kelâm edip akd-i âtî sudûruna değin silk-i mülk-i sahîhimde münselik olan emlâkimden karye-i mezbûrede vâki‘ iki tarafdan müvekkile-i merkūme Hatice Hâtun mülkü ve bir tarafdan Mihmân Kethüdâ b. Abdullah mülkü ve bir tarafdan tarîk-i âm ile mahdûd bir bâb beyt-i süflîyi ve eşcâr-ı müsmire ve gayr-ı müsmireyi muhtevî bahçeyi ve havluyu ve kenîfi müştemil mülk menzilimi cemî‘ tevâbi‘ ve levâhıkı ve âmme-i menâfi‘ ve merâfıkı ile müvekkile-i merkūme Hatice Hâtun’a iki bin altı yüz altmış ceyyid ve cedîd râyic fi’l-vakt akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm edip ol dahi vech-i muharrer üzre iştirâ ve tesellüm ettikden sonra semeni olan mezbûrü’n-na‘t iki bin altı yüz altmış akçeyi yedinden bi’t-tamâm ve’l-kemâl ahz u kabz eyledim ba‘de’l-yevm mârrü’z-zikr menzil mezbûre Hatice Hâtun’un [40b ] mülk-i müşterâ-yı sahîh ve sarîhidir keyfe mâ teşâ’ve tahtâr mutasarrıfa olsun dedikde mukırr-ı mezbûrun ber vech-i muharrer cârî ve sâdır olan ikrâr ve takrîrini vekîl-i merkūm Mehmed Bey bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olundu. Tahrîren fi’l-yevmi’r-râbi‘ aşer min Cumâdelûlâ li sene erba‘a ve hamsîn ve elf. Şuhûdü’l-hâl: Fahrü’l-akrân Ömer Ağa b. Ramazan, Fahrü’l-cüyûş Ahmed Çavuş b. İbrahim, Mehmed Hâce b. Hüseyin, Ahmed Çelebi b. Mehmed, Hüseyin b. Receb, Mihmân Kethüdâ b. Abdullah, Mustafa Çelebi b. Mihmân, İbrahim Çelebi min huddâm ve gayruhüm mine’l-huzzâr