Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 196 Hüküm no: 208 Orijinal metin no: [40b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Bahçede taş çıkarırken taşların altında kalarak ölen Haçuk ve Nordik’in cesedlerinin keşfine dâir Medîne-i Ebâ Eyyûb el-Ensârî -radiye anhu Rabbühü’l-Bârî- mahallâtından Baba Haydar mahallesinden vâki‘ Arabzâde odaları demekle ma‘rûf bahçenin mâliki kıd[ve]tü’l-emâsil ve’l-a‘yân Hamza Ağa b. Abdülmennân taraf-ı karînü’ş-şereflerinden husûs-ı âti’l-beyâna vekîl olup hasm-ı şer‘î-i câhid mahzarında bimâ hüve nehcü’s-sübût şer‘an vekâleti sâbite olan fahrü’l-akrân Sinan Bey b. Mehmed meclis-i şer‘-i hatîr-i lâzımü’t-tevkīrde takrîr-i kelâm ve bast-ı merâm edip müvekkilim müşârün-ileyh Hamza Ağa mahalle-i mezbûrede vâki‘ lede’l-ahâlî ma‘lûmü’l-hudûd mülk bahçesinde vâki‘ odaları tecdîd ve ta‘mîr için bahçe-i mezbûre meyânında taş çıkarırken müste’ciri olan Haçuk v. Avanos ve Nordik v. Baran nâm Ermenileri bi-kazâin taş basıp helâk olmuşlardır, kıbel-i şer‘-i kavîmden üzerine varılıp vâki‘ hâl keşf ve tahrîr olunması matlûbumdur dedikde cânib-i şer‘-i kavîmden mevlânâ Hidâyetullah Efendi irsâl olunup ol dahi medîne-i mezbûre çorbacısı İbrahim Ağa ve subaşısı Ali Bey ve zeyl-i kitâbda mastûrü’l-esâmî olan müslimîn ile zikr olunan bahçeye var[d]ıklarında fi’l-hakīka zikr olunan bahçe meyânından müste’cirân-ı merkūmân Haçuk ve Nordik taş çıkarırken üze[r]lerine taş yıkılıp altında kalmağın mezkûr Haçuk’un sağ dizinden aşağısını taş urup ezip ve merkūm Nordik’in dahi başını taş-ı kebîr ezip merkūmân Haçuk ve Nordik’in ma‘an ol cerâhatden helâ[k] olduklarını mu‘âyene ve müşâhede ettiklerinde vâki‘ hâli mevlânâ-yı mezbûr mahallinde tahrîr edip ba‘dehû meclis-i şer‘de alâ vukū‘ihî ihbâr etmeğin işbu hurûf bi’t-taleb ketb olundu. Tahrîren fi’l-yevmi’r-râbi‘ aşer min Cumâdelûlâ li sene erba‘a ve hamsîn ve elf. Şuhûdü’l-hâl: İsmail Efendi b. Sefer el-Kadı, Ahmed Çelebi b. Sefer el-Müderris, Ali Beşe b. Abdullah er-Râcil, Mehmed Çelebi b. Mustafa Solakzâde, Ali Beşe b. Mustafa el-Muhzır, Mehmed Çelebi b. Ali er-Râcil, İsmail Beşe b. el-Hâc Mehmed, İbrahim Ağa Çorbacı, Ali Bey b. ( ) subaşı ve gayruhüm