Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 197 Hüküm no: 209 Orijinal metin no: [40b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed b. Abbas’ın suda yıkanırken boğularak öldüğü ve cesedinin keşfine dâir Havâss-ı Aliyye kazâsı müzâfâtından Çekmece-i Suğrâ nâhiyesine tâbi‘ Papas nâm karye sükkânından olup der-i devlet kapıcıbaşılarından Mustafa Ağa’nın kethüdâsı Sinan Bey târih-i kitâb günü şer‘-i şerîf-i lâzımü’t-tevkīr ve’t-teşrîfde takrîr-i kelâm ve bast-ı mukaddemât-ı merâm edip müşârün-ileyh Mustafa Ağa’nın müste’cirlerinden Mehmed b. Abbas nâm kimesne târih-i mezbûrda karye-i merkūme ile Halkalı nâm karye beyninde vâki‘ vâdi içinde olan suda kendi sun‘ ve ihtiyârı ile gusl ederken bi-kazâillâh ve kaderihî boğulup fevt olmuşdur, kıbel-i şer‘den üzerine varılıp keşf ve mu‘âyene olunmak matlûbumdur dedikde savb-ı şer‘-i kavîmden mevlânâ Receb Efendi irsâl olunup ol dahi zeyl-i kitâb hâlî ani’ş-şekki ve’l-irtiyâbda mastûrü’l-esâmî olan müslimîn ile vâdi-i mezbûra varıp müşâhede eylediklerinde fi’l-vâki‘ mezbûr Mehmed’in a‘zâsında kat‘â eser-i cerh-i vefâtdan bir şey olmayıp kendi sun‘ ve ihtiyârı ile suya boğulup fevt olduğu zâhir olmağın mevlânâ-yı mezbûr vâki‘ hâli mahallinde ketb ü tahrîr ba‘dehû gelip ihbâr [ve] takrîr eylemeğin vâki‘ hâl bi’t-taleb ketb ve terkīm olundu. Fi’l-yevmi’r-râbi‘ aşer min şehri Cumâdelûlâ li sene erba‘a ve hamsîn ve elf. Şuhûdü’l-hâl: Hanîfüddin Efendi b. Mehmed el-İmâm, Süleyman b. Abdullah el-Cündî, Hasan b. Mustafa, Hüseyin b. Abdullah, Halil b. Mehmed, Cafer b. Abdullah, Ebûbekir Beşe b. Abdullah, Ali b. Abdullah Serrâc-ı sultânî, Osman b. Mehmed ve gayruhüm