Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 197 Hüküm no: 210 Orijinal metin no: [40b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Vefât eden Mahmud Bey b. Abdullah’ın evinin borçları ve nafaka ihtiyâcı için Hâfız Mustafa Ağa b. Ali’ye satıldığı Medîne-i Ebâ Eyyûb-i Ensârî -radiye anhu Rabbühü’l-Bârî- mahallâtından Câmi‘-i Kebîr mahallesinde sâkin iken bundan akdem fevt olan Mahmud Bey b. Abdullah nâm müteveffânın verâseti zevce-i metrûkesi Âişe bt. Abdurrahman nâm hâtuna ve sulbiyetân-ı sagīretân kızları Âmine ve Ümmügülsüm’e münhasıra olduğu mütehakkik oldukdan sonra mezbûre Âişe Hâtun tarafından husûs-ı âti’l-beyâna vekîl olup hasm-ı şer‘î-i câhid mahzarında bimâ hüve nehcü’s-sübût şer‘an vekâleti sâbite olan babası mezbûr Abdurrahman Efendi vekâleten ve sagīretân-ı merkūmetân Âmine ve Ümmügülsüm’ün cânib-i şer‘-i kavîmden mansûb vasîleri olan fahrü’l-cünûd [41a ] ve’l-cüyûş Ahmed Çavuş b. Hamdi vesâyeten meclis-i şer‘-i şerîf-i lâzımü’t-teşrîfde vezîr-i a‘zam ve müşîr-i efham nizâmü’l-âlem müdebbir-i umûri’l-cumhûr bi’l-fikri’s-sâkıb, mütemmim-i mehâmmi’l-enâmi bi’r-re’yi’s-sâ’ib Mehmed Paşa -yesserallâhu mâ yeşâ’- hazretlerinin kapıcıbaşılarından işbu kitâb-ı sedâd-intisâbın hâfızı olan umdetü’l-emâsil ve’l-a‘yân zübdetü’l-e‘âzım ve’l-erkân Hâfız Mustafa Ağa b. Ali mahzarında bi’l-vekâle ve bi’l-vesâye her biri ikrâr ve takrîr-i kelâm edip müteveffâ-yı mezbûrun muhallefâtından mahalle-i mezbûrede vâki‘ bir tarafdan Kara Kapıcı demekle ma‘rûf Mehmed Bey veresesi mülküne ve bir tarafdan Zâhide Hâtun bt. ( ) ve bir tarafdan mekābir-i müslimîn ve bir tarafdan tarîk-i âma müntehî ve mümtâz bir bâb fevkānî ve bir bâb tahtânî beyti ve sofayı ve köşkü ve ona muttasıl kahve odasını ve üç bi’r-i mâyı ve iki kenîfi ve tûlen ve arzan bi-hesâb-ı şatrancî bin iki yüz zirâ‘ bağı ve zât-ı eşcâr-ı müsmire ve gayr-ı müsmire bahçeyi müştemil mülk menzili deyn-i müsbet ve zarûret-i nafaka için bey‘ olunması lâzım ve mühim olmağın menzil-i mahdûd-ı mezkûr sûk-ı sultâniyyede beyne’t-tâli[b]în kirâren ve mirâren müzâyede olunup bahâsı müşârün-ileyh Mustafa Ağa üzerinde altmış bir bin akçede karâr edip ziyâdeden rağabât münkatı‘a oldukdan sonra müşârün-ileyh Hâfız Mustafa Ağa’ya altmış bir bin akçeye olmak hesâbı üzre yedi yüz altmış iki buçuk riyâlî guruşa vekâlet [ve] vesâyetim hasebiyle bey‘-i bâtt-ı sahîh-i şer‘î ile bey‘ ve teslîm ve ol dahi vech-i muharrer üzre iştirâ ve kabz ve tesellüm ettikden sonra semeni olan meblağ-ı mersûmu vekâlet [ve] vesâyetim hasebiyle mûmâ-ileyh Hâfız Mustafa Ağa yedinden bi’t-tamâm ve’l-kemâl ahz u kabz eyledik ba‘de’l-yevm menzil-i mahdûd mezbûr müşârün-ileyh Hâfız Mustafa Ağa’nın müşterâ-yı sahîh [ve] sarîhidir keyfe mâ yeşâ’ ve hasbe mâ yürîd mutasarrıf olsun dedikde gıbbe’t-tasdîki’ş-şer‘î mâ hüve’l-vâki‘ gıbbe’l-ibtigā sebt ve imlâ olundu. Tahrîren fi’l-yevmi’s-sâmin min Cumâdelûlâ li sene erba‘a ve hamsîn ve elf. Şuhûdü’l-hâl: Fahrü’l-müderrisîni’l-kirâm Hasan Efendi b. Yusuf ..?, Zahrü’l-müderrisîni’l-kirâm Ali Efendi eş-şehîr bi-Attârzâde, Fahrü’l-eimme Hüseyin Çelebi el-ma‘rûf bi-Şerifzâde, Kıdvetü’l-emsâl Mehmed Çelebi b. Mahmud, Abdullah Efendi el-İmâm, Hüseyin b. Cafer, Derviş Ali b. Ali er-Râcil, Süleyman b. Ahmed, Ali Dede Bostânî, İbrahim Çelebi min huddâm, Abdullah Çavuş b. Ali Ağa ve gayruhüm