Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 198 Hüküm no: 211 Orijinal metin no: [41a-1, Arapça] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ali b. Abdullah’ın oğlu Mustafa üzerine vasî tayin edildiği ve ninesi Canfedâ Hâtun’un da nâzır olduğu Hâkimü muvakki‘u a‘lâhu -dâme fazluhû ve alâhu es‘adehû fi’d-dâreyni Mevlâhü- râfi‘ü hâze’l-kitâb Ali b. Abdullah nâm kimesneyi Mustafa nâm sulbî sagīr oğlu vasîye muhtâc olmağın üzerine evân-ı rüşdüne ve zamân-ı bülûğuna değin ahvâlini zabt etmek ve bundan akdem Ebâ Eyyûb el-Ensârî -radiye anhu Rabbühü’l-Bârî- mahallâtından Câmi‘-i Kebîr mahallesinde sâkine iken müteveffât olan annesi Râbia Hâtun bt. Abdullah’dan intikāl eden kadri ve nisâbı fıddî cedîd râyic fi’l-vakt iki bin üç yüz akçe olan emvâlini hıfz etmek üzre vasiyy-i şer‘î ta‘yîn etmeğin ol dahi vesâyet-i mezbûreyi kabûl ve umûrunu ikāme etmeyi mültezim oldukda nasb ve kabûl-i sahîhayn-i şer‘iyyeynden sonra sagīr-i mezbûrun ninesi olan Canfedâ Hâtun bt. Abdullah nâm hâtunu dahi sagīr-i mezbûrun umûrundan nâzıra-i mezbûrenin ma‘rifeti ve izni olmaksızın hiçbir şey yapmamak üzre onun üzerine nâzır kıldıkda ol dahi nezâret-i mezbûreyi kabûl ve umûrunu ikāme etmeyi iltizâm ettikde kabûl ve iltizâm-ı sahîhayn-i şer‘iyyeyn [kayd olundu]. Cerâ zâlike ve hurrire fi’l-yevmi’s-sâdis aşer min Cumâdelûlâ li sene erba‘a ve hamsîn ve elf. Şuhûdü’l-hâl: Fahrü’l-akrân Yusuf Bey b. Abdullah el-Cündî, Ali Çelebi b. Mehmed, Ramazan b. Mahmud, mefharü’l-kuzât Receb Efendi, Hüseyin Çelebi b. Ali el-Muhzır, Mustafa Beşe b. Mehmed el-Muhtesib, Ali Beşe b. Mustafa min huddâm, Süleyman b. Turgud min huddâm ve gayruhüm mine’l-huzzâr