Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 199 Hüküm no: 212 Orijinal metin no: [41a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İbrahim Çelebi b. İsmail’in evini Mehmed Çelebi b. Mehmed’e sattığı Medîne-i Ebâ Eyyûb-i Ensârî -radiye anhu Rabbühü’l-Bârî- mahallâtından Kasımpaşa mahallesinde sâkin mefhar-i erbâbü’t-tahrîr ve’l-kalem İbrahim Çelebi b. İsmail meclis-i şer‘-i şerîf-i enver ve mahfil-i dîn-i münîf-i ezherde işbu râfi‘ü’l-kitâb Mehmed Çelebi b. Mehmed mahzarında bi’t-tav‘i’s-sâf ikrâr-ı tâm ve takrîr-i kelâm edip akd-i âtî sudûruna değin silk-i mülk-i sahîh ve sarîhimde münselik mahalle-i mezbûrede vâki‘ bir tarafdan yaycı Ramazan b. Abdullah menzili ve bir tarafdan merhûm Evranos Dede vakfı ve bir tarafdan kâfirî binâ ve bir tarafdan tarîk-i âm ile mahdûd iki bâb fevkānî beyti ve iki bâb vustânî beyti ve altında ahırı ve kenîfi müştemil mülk menzilimi cemî‘ tevâbi‘ ve levâhıkı ve kâffe-i menâfi‘ ve merâfıkı ile merkūm Mehmed Çelebi’ye on altı bin ceyyid ve cedîd fıddî-i Osmânî râyic fi’l-vakt akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm edip ol dahi vech-i muharrer üzre iştirâ ve tesellüm ettikden sonra semen-i mezbûrü’n-na‘t on altı bin akçeyi yedinden bi’t-tamâm ve’l-kemâl ahz u kabz eyledim ba‘de’l-yevm mârrü’z-zikr menzil mezbûr Mehmed Çelebi’nin mülk-i müşterâ-yı sahîh ve sarîhidir keyfe mâ yeşâ’ mutasarrıf olsun dedikde mukırr-ı mezbûrun ber vech-i mübeyyen cârî ve sâdır olan ikrârını el-mukarru lehü’l-mezbûr bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ gıbbe’t-taleb ketb olundu. Tahrîren fi’l-yevmi’s-sâdis aşer min Cumâdelûlâ li sene erba‘a ve hamsîn ve elf. Şuhûdü’l-hâl: Fahrü’l-akrân Veli Bey b. Süleyman Cündî, yaycı Ramazan b. ( ), Mustafa Beşe b. Abdullah er-Râcil, Ahmed Çelebi b. ...? er-Râcil, Kaytas Bey b. Abdullah, Mahmud Bey b. Abdullah el-Cündî, Abdurrahman Çelebi b. Habib er-Râcil, Ahmed Beşe Çukadâr ve gayruhüm