Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 200 Hüküm no: 213 Orijinal metin no: [41b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Apostol v. Mihail’in tasarrufundaki tarlayı Yorgi v. Kirka’ya devrettiği Vilâyet-i Anadolu’da Niğde sancağında Ürgüp kazâsına tâbi‘ Zileli nâm karye[de] sâkin Apostol v. Mihail nâm zimmî meclis-i şer‘-i hatîr-i lâzımü’t-tevkīrde işbu râfi‘ü’l-kitâb Yorgi v. Kirka nâm zimmî muvâcehesinde bi’t-tav‘i’s-sâf ikrâr ve takrîr-i kelâm edip karye-i mezbûre sınırı dâhilinde vâki‘ bir tarafdan Yadigâr v. Teberik tarlası ve bir tarafdan Hayot v. ( ) ve bir tarafdan göl ve bir tarafdan hark ile mahdûd tahmînen iki keyl tohum isti‘âb eder tarlamın hakk-ı tasarrufunu sâhib-i arz ma‘rifetiyle mezbûr Yorgi’ye yedi yüz ceyyid ve cedîd râyic fi’l-vakt fıddî-i Osmânî akçeye tefvîz edip ol dahi vech-i muharrer üzre tefevvuz ve kabûl eyledikden sonra mukābele-i tefvîz[de] olan mezbûrü’n-na‘t yedi yüz akçeyi mezbûr Yorgi yedinden bi’t-tamâm ve’l-kemâl ahz u kabz eyledikden sonra sâbıku’z-zikr tarlayı mahallinde kabza ve tasarrufa mezbûr Yorgi’yi taslît eyledim ba‘de’l-yevm zikr olunan tarlayı cemî‘ tevâbi‘ ve levâhıkı ile mezbûr Yorgi’nin mülk-i müfavvazıdır keyfe mâ yeşâ’ mutasarrıf olsun dedikde mukırr-ı mezbûrun vech-i mübeyyen üzre cârî ve sâdır olan ikrâr ve takrîrini el-mukarru lehü’l-mezbûr bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olundu. Tahrîren fi’l-yevmi’s-sâbi‘ aşer min Cumâdelûlâ li sene erba‘a ve hamsîn ve elf. Şuhûdü’l-hâl: Mehmed Beşe b. Ali, Cafer Beşe b. Receb, Bayram v. Vasil, Beyli v. Vasil, Vastornos v. Yani, Loros v. Yadigâr, İstadri v. Vasil, May v. Yadigâr, Tebterek v. Yorgi, Emin v. Apala, Yorgi v. Kirka ve gayruhüm