Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 200 Hüküm no: 214 Orijinal metin no: [41b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Apostol v. Mihail’in Lori v. Yadigâr’a iki parça mülk bağını sattığı ve tasarrufundaki iki tarlanın tasarruf hakkını devrettiği Vilâyet-i Anadolu’da Niğde sancağında Ürgüp kazâsına tâbi‘ Zileli nâm karyede sâkin Apostol v. Mihail nâm zimmî meclis-i şer‘-i hatîr-i lâzımü’t-tevkīrde işbu râfi‘ü’l-kitâb Lori v. Yadigâr nâm zimmî muvâcehesinde bi’t-tav[‘] ve’r-rızâ ikrâr ve takrîr-i kelâm edip akd-i âtî sudûruna değin silk-i mülk-i sahîhimde münselik olan emlâkimden karye-i mezbûre kürûmu dâhilinde vâki‘ bir tarafdan mezbûr Yadigâr bağı ve bir tarafdan Anastas v. Tavermiş bağı ve iki tarafdan tarîk-i âm ile mahdûd ve iki dip armudu müştemil ve yine karye-i mezbûre kürûmu dâhilinde vâki‘ bir tarafdan Hristodori bağı ve bir tarafdan Yadigâr bağı ve bir tarafdan dere ve bir tarafdan kavaklık ile mahdûd iki kıt‘a bağımı safka-i vâhide ile mezbûr Lori’ye bin cedîd ceyyid râyic fi’l-vakt akçeye tarafeynden îcâb ve kabûlü hâvî bey‘-i kat‘î ile bey‘ edip ol dahi vech-i muharrer üzre iştirâ ettikden sonra semen-i mezbûrü’n-na‘t bin akçeyi yedinden bi’t-tamâm ve’l-kemâl ahz u kabz eylediğimden sonra yine karye-i mezbûre sınırı dâhilinde vâki‘ bir tarafdan Yadigâr tarlası ve bir tarafdan Gregori tarlası ve bir tarafdan hark ve bir tarafdan Yahya Beşe tarlası ile mahdûd tahmînen iki keyl tohum isti‘âb eder ve yine karye-i mezbûre hudûdu dâhilinde vâki‘ bir tarafdan mezbûr Hristodori tarlası ve bir tarafdan Gersen tarlası ve bir tarafdan Osman Beşe tarlası ve bir tarafdan Süleyman b. Ebûbekir tarlası ile mahdûd tahmînen buçuk keyl tohum isti‘âb eder iki kıt‘a tarlamın hakk-ı tasarruflarını sâhib-i arz ma‘rifetiyle mezbûr Lori’[y]e beş yüz ceyyid ve cedîd râyic fi’l-vakt akçeye tefvîz edip ol dahi vech-i muharrer üzre tefevvuz ve kabûl ettikden sonra mukābele-i tefvîz olan meblağ-ı mezbûrü’n-na‘t beş yüz akçeyi yedinden bi’t-tamâm ve’l-kemâl ahz u kabz eylediğimden sonra mesbûkü’z-zikr bağları ve tarlaları mahallinde kabz ve tasarrufa mezbûr Lori’yi taslît eyledim ba‘de’l-yevm mârrü’z-zikr iki kıt‘a bağ mezbûr Lori’nin mülk-i müşterâ-yı sahîh ve sarîhidir ve mârrü’z-zikr tarlalar mülk-i müfavvazıdır keyfe mâ yeşâ’ mutasarrıf olsun dedikde mukırr-ı mezbûrun vech-i mübeyyen üzre cârî ve sâdır [olan] ikrâr ve takrîrini el-mukarru lehü’l-mezbûr Lori bi’l-muvâcehe tasdîk edicek mâ hüve’l-vâki‘ bi’t-taleb ketb olundu. Hurrire fi’l-yevmi’s-sâbi‘ aşer min Cumâdelûlâ li sene erba‘a ve hamsîn ve elf. Şuhûdü’l-hâl: Mehmed, es-sâbıkūn