Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 201 Hüküm no: 215 Orijinal metin no: [41b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yani v. Mihal’in annesinden intikal eden bağını Yani v. Yorgi’ye sattığı Vilâyet-i Rumeli’nde İnebahtı sancağında Gerbeniş kazâsına tâbi‘ Vetrili nâm karye sâkinlerinden olup sinninin bülûğa tahammülü ve bülûğuna mu‘terif olan Yani v. Mihal nâm zimmî-i emred meclis-i şer‘-i hatîr-i lâzımü’t-tevkīrde işbu râfi‘ü’l-kitâb Yani v. Yorgi nâm zimmî mahzarında bi’t-tav‘ ve’r-rızâ ikrâr ve i‘tirâf edip akd-i âtî sudûruna değin mülk-i mevrûsum olup karye-i mezbûre sınırında vâki‘ bir tarafdan Andriye v. Mihail bağı ve bir tarafdan Yorgi [v.] Harito bağı ve bir tarafdan Tanaş v. Yani ve bir tarafdan tarîk-i âm ile mahdûd tahmînen dört çapalık vâlidem Lajo bt. Kiryazi’den intikāl eden bağımı cemî‘ tevâbi‘ ve levâhıkı ve kâffe-i menâfi‘ ve merâfıkı ile mezbûr Yani’ye cedîd ceyyid râyic fi’l-vakt dört bin akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve ol dahi vech-i muharrer üzre iştirâ ettikden sonra semeni olan mezbûrü’n-na‘t dört bin akçeyi yedinden bi’t-tamâm ve’l-kemâl ahz u kabz eylediğimden sonra bağ-ı mezbûru mahallinde ahz u kabza müşterî-i merkūm Yani’yi taslît eyledim ba‘de’l-yevm mârrü’z-zikr bağ mülk-i müşterâ-yı sahîh ve sarîhidir keyfe mâ yeşâ’ ve hasbe mâ yürîd bilâ-nizâ‘ min karîb ev ba‘îd mutasarrıf olsun dedikde mukırr-ı mezbûrun ber vech-i mübeyyen cârî ve sâdır olan ikrâr ve takrîrini el-mukarru lehü’l-mezbûr Yani bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb ve imlâ olundu. Tahrîren fi’l-yevmi’s-sâmin min Cumâdelûlâ li sene erba‘a ve hamsîn ve elf. Şuhûdü’l-hâl: Yorgi Doğancı, Yani v. Mezevil, Yani v. Kiro, Dimo v. Kiro, Mavrodi v. Kozma, Avyori v. Dimo, Moskovilo v. Mozeri, Yani v. Komyono, Yorgi v. Kofdan, Kiryazi v. Harito, Yani v. Moskovilo ve gayruhüm