Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 202 Hüküm no: 216 Orijinal metin no: [42a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Dimo v. Kiryazi’nin mülk bostan yerini Yani v. Dimo’ya sattığı Vilâyet-i Rumeli’nde İnebahtı sancağında Gerbeniş kazâsına tâbi‘ Vetrili nâm karye sâkinlerinden Dimo v. Kiryazi nâm zimmî meclis-i şer‘-i hatîr-i lâzımü’t-tevkīrde işbu râfi‘ü’l-kitâb Yani v. Dimo nâm zimmî mahzarında bi’t-tav‘i’s-sâf ikrâr ve takrîr-i kelâm edip akd-i âtî sudûruna değin silk-i mülk-i sahîhimde münselik olan emlâkimden karye-i mezbûre sınırı dâhilinde vâki‘ bir tarafdan Yorgi v. Dimo mülkü ve bir tarafdan Yani v. Minho ve bir tarafdan vâdi ve bir tarafdan tarîk-i âm ile mahdûd bir dip ceviz ve iki dip armut ağacını hâviye bir kıt‘a mülk bostan yerini bi-cümleti’t-tevâbi‘ ve’l-levâhık ve kâffeti’l-menâfi‘ ve’l-merâfık mezbûr Yani’ye bin altı yüz elli ceyyid cedîd râyic fi’l-vakt akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve ol dahi ber vech-i muharrer iştirâ eyledikden sonra semeni olan bin altı yüz elli mezbûrü’n-na‘t akçeyi bi’t-tamâm ve’l-kemâl ahz u kabz edip mebî‘-i mezkûru mahallinde kabza müşterî-i merkūmu taslît eyledim, ba‘de’l-yevm bostan-ı mahdûd-ı mezkûr merkūm Yani’nin mülk-i müşterâ-yı sarîhidir keyfe mâ yeşâ’ ve yahtâr mutasarrıf olsun dedikde mukırr-ı mezbûrun vech-i mübeyyen üzre cârî ve sâdır olan ikrâr ve takrîrini el-mukarru lehü’l-mezbûr Yani bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ gıbbe’t-taleb ketb ve imlâ olundu. Hurrire fi’l-yevmi’s-sâmin aşer min Cumâdelûlâ li sene erba‘a ve hamsîn ve elf. Şuhûdü’l-hâl: Es-Sâbıkūn