Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 202 Hüküm no: 217 Orijinal metin no: [42a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Osman b. İskender’in mülk çiftliği ile bağını ve dut ağaçlarını Petko v. Vaso’ya sattığı ve çiftliğe bağlı tarlaların tasarruf hakkını devrettiği Vilâyet-i Rumeli’nde Arnavud Belgradı kazâsına tâbi‘ Polen nâm karye sâkinlerinden Osman b. İskender nâm kimesne meclis-i şer‘-i hatîr-i lâzımü’t-tevkīrde işbu râfi‘ü’l-kitâb Nano v. Niko nâm zimmî muvâcehesinde bi’t-tav‘i’s-sâf ikrâr ve takrîr-i kelâm edip akd-i âtî sudûruna değin silk-i mülk-i sahîh ve sarîhimde münselik olan emlâkimden karye-i mezbûre dâhilinde vâki‘ bir tarafdan Petko v. Vaso mülküne ve bir tarafdan Kolo v. Andriye mülküne ve bir tarafdan Minho v. Yani mülküne ve bir tarafdan tarîk-i âma müntehî bir anbarı ve altı fıçıyı ve bir şırahâneyi müştemil çiftlik ta‘bîr olunan bir bâb mülk menzilimi cemî‘ tevâbi‘ ve levâhık ve kâffe-i menâfi‘ ve merâfıkı ile ..? ve yine karye-i mezbûre hudûdu dâhilinde vâki‘ iki tarafdan Petko v. Vaso bağı ve bir tarafdan Kigo nâm zimmî tarlası ve bir tarafdan Nano nâm zimmî bağı ile mahdûd tahmînen beş çapalık bir kıt‘a mülk bağımı ve yine karye-i mezbûre sınırı dâhilinde vâki‘ mevâzi‘-i müteferrikada altı dip mülk dut ağacı ile on dip mülk zeytin ağacımı bi-safkatin vâhidetin mezbûr Nano’ya üç bin ceyyid ve cedîd fıddî râyic fi’l-vakt akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve ol dahi vech-i muharrer üzre iştirâ ettikden sonra yine mesbûkü’z-zikr çiftliğe tâbi‘ karye-i mezbûre sınırı dâhilinde olup mevâzi‘-i adîdede vâki‘ lede’l-ahâlî ve’l-cîrân ma‘lûmetü’l-hudûd taht-ı tasarrufumda olan tarlalarımın hakk-ı tasarrufunu sâhib-i arz ma‘rifetiyle mezbûr Nano’ya bin üç yüz ceyyid ve cedîd râyic fi’l-vakt akçeye tefvîz ve ol dahi vech-i muharrer üzre tefevvuz ve kabûl ettikden sonra mukābele-i bey‘ ve tefvîzde olan mezbûrü’n-na‘t dört bin üç yüz akçeyi yedinden bi’t-tamâm ve’l-kemâl alıp kabz eylediğimden sonra zikr olunan menzilimi ve bağı ve dut ve zeytin ağaçlarını ve tarlaları kabz ve tasarrufa mezbûr Nano’yu taslît eyledim ba‘de’l-yevm mârrü’z-zikr menzil ve bağ ve dut ve zeytin ağaçları mezbûr Nano’nun mülk-i müşterâ-yı sahîh ve sarîhidir ve tarlalar mülk-i müfavvazıdır sâir emsâli gibi keyfe mâ yeşâ’ ve yahtâr mutasarrıf olsun dedikde mukırr-ı mezbûrun ber vech-i mübeyyen cârî ve sâdır olan ikrâr ve takrîrini el-mukarru lehü’l-mezbûr bi’l-muvâcehe tasdîk ve bi’l-müşâfehe tahkīk etmeğin mâ hüve’l-vâki‘ bi’t-taleb ketb olundu. Tahrîren fi’l-yevmi’s-sâmin aşer min Cumâdelûlâ li sene erba‘a ve hamsîn ve elf. Şuhûdü’l-hâl: Osman b. İsâ, Yusuf b. Mehmed, Ali Beşe b. Mustafa, el-Hâc Ahmed Beşe Çukadâr ve gayruhüm mine’l-huzzâr