Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 203 Hüküm no: 218 Orijinal metin no: [42a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Âişe Hâtun bt. Hasan’ın arsasını Ebûbekir Efendi b. Osman’a sattığı Medîne-i Ebâ Eyyûb-i Ensârî -radiye anhu Rabbühü’l-Bârî- mahallâtından İslâm Bey mahallesinde sâkine Âişe Hâtun bt. Hasan meclis-i şer‘-i şerîf-i enver ve mahfil-i dîn-i münîf-i ezherde işbu râfi‘ü’l-kitâb fahrü’l-eimmeti’l-kirâm Ebûbekir Efendi b. Osman mahzarında bi’t-tav‘ ve’r-rızâ ikrâr ve takrîr-i kelâm edip [akd-i âtî] sudûruna değin silk-i mülk-i sahîh ve sarîhimde münselik olan emlâkimden mahalle-i mezbûrede vâki‘ bir tarafdan Sâlih Paşa Sarayı ve iki tarafdan bâyi‘a-i mezbûre Âişe Hâtun menzili ve bir tarafdan tarîk-i âm ile mahdûd üç dip ceviz ağacını muhtevî bi-zirâ‘i’l-bennâ tûlen ve arzan bi-hesâb-ı şatrancî yedi bin zirâ‘ mülk arsa-i hâliyemi mezbûr Ebûbekir Efendi’ye cemî‘ tevâbi‘ ve levâhıkı ve kâffe-i menâfi‘ ve merâfıkı ile beş bin ceyyid ve cedîd fıddî-i Osmânî râyic fi’l-vakt akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm ve ol dahi vech-i muharrer üzre iştirâ ve tesellüm ettikden sonra semeni olan mezbûrü’n-na‘t beş bin akçeyi yedinden bi’t-tamâm ve’l-kemâl ahz u kabz eyledim, ba‘de’l-yevm mârrü’z-zikr arsa-i hâliye merkūm Ebûbekir Efendi’nin mülk-i müşterâ-yı sahîh ve sarîhidir keyfe mâ yeşâ’ ve hasbe mâ yahtâr mutasarrıf olsun dedikde mukırra-i mezbûrenin ber vech-i mübeyyen cârî ve sâdır olan ikrâr ve takrîrini el-mukarru lehü’l-mezbûr bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olundu. Tahrîren fi’l-yevmi’s-sâmin aşer min Cumâdelûlâ li sene erba‘a ve hamsîn ve elf. Şuhûdü’l-hâl: Fahrü’l-eimme Ali Efendi b. Mehmed, Hüseyin b. Mehmed, Receb Efendi b. Abdi, Ali Beşe b. Mustafa, Hüseyin b. Ali, Mustafa Beşe b. Veli, el-Hâc Ahmed Beşe Çukadâr, Hidâyetullah Efendi el-Kâtib, el-Hâc Ali Efendi b. Hüseyin ve gayruhüm