Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 204 Hüküm no: 219 Orijinal metin no: [42a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Vefât eden Kali bt. Yorgi’nin borçları için evinin yetimlerinin vasîsi Nikola v. Yorgi tarafından Yani v. Ergiri’ye satıldığı Vilâyet-i Rumeli’nde İnebahtı sancağında Gerbeniş kazâsına tâbi‘ Çermehorya nâm karye sâkinlerinden iken bundan akdem hâlike olan Kali bt. Yorgi nâm Nasrâniyyenin verâseti sadrî oğulları Yorgi ve Dimo ve Niko ve Şiro ve Kali nâm sagīrlere münhasıra olduğu şer‘an zâhir oldukdan sonra sıgār-ı mezbûrûnun tesviye-i umûru için kıbel-i şer‘den vasî olan Nikola v. Yorgi nâm zimmî meclis-i şer‘-i şerîf-i şâmihü’l-imâd ve mahfil-i dîn-i münîf-i râsihü’l-evtâdda işbu râfi‘ü’l-vesîka Yani v. Ergiri nâm zimmî muvâcehesinde bi’l-vesâye ikrâr ve takrîr-i kelâm edip hâlike-i mezbûrenin düyûn-ı müsbetesi olup muhallefâtından menkūlât makūlesinden düyûnuna vefâ eder bir şeyi olmayıp akārâtı bey‘ olunmak lâzım ve mühim olmağın muhallefâtından olup karye-i mezbûre sınırı dâhilinde vâki‘ bir tarafdan Yorgi v. Lambo bağı ve bir tarafdan Yani v. Karine bağı ve bir tarafdan dere ve bir tarafdan tarîk-i âm ile mahdûd tahmînen beş çapalık bağı kirâren ve mirâren sûk-ı sultânîde bey‘-i men yezîd [42b ] ile müzâyede olunup rağabât-ı nâs bi’l-külliyye münkatı‘a oldukdan sonra hakk-ı karârı ile bin akçede mezbûr Yani üzerinde karâr edip bir akçe ziyâde ile âhar tâlibi olmamağın vesâyet-i mahkiyem hasebiyle hâlike-i mezbûrenin düyûn-ı müsbetesi için merkūm Yani’ye bin ceyyid ve cedîd fıddî râyic fi’l-vakt akçeye tarafeynden îcâb ve kabûlü hâvî bey‘-i bâtt-ı kat‘î ile bey‘ ve ol dahi vech-i muharrer üzre iştirâ ettikden sonra semen-i mezbûrü’n-na‘t bin akçeyi yedinden bi’t-tamâm ve’l-kemâl ahz u kabz edip mebî‘-i mezbûru mahallinde kabza mersûm Yani’yi taslît eyledim ba‘de’l-yevm mârrü’z-zikr bağ mezbûr Yani’nin mülk-i müşterâ-yı sahîh ve sarîhidir keyfe mâ yeşâ’ ve yürîd mutasarrıf olsun dedikde mukırr-ı mezbûrun bi’l-vesâye vech-i mübeyyen üzre cârî ve sâdır olan ikrârını el-mukarru lehü’l-mezbûr bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ gıbbe’l-ibtigā ketb olundu. Tahrîren fi’l-yevmi’s-sâmin aşer min Cumâdelûlâ li sene erba‘a ve hamsîn ve elf. Şuhûdü’l-hâl: Kanili v. Koni, Yani v. Tarona, Yorgi v. Ulah, Dimo v. Konboti, Nikola v. Polaki, Minho v. Alariso, Patnaş v. Polyaş, Nikola v. Polyaş ve gayruhüm mine’l-hâzırîn