Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 205 Hüküm no: 220 Orijinal metin no: [42b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Âmine Hâtun bt. Hamza’nın mülk evi ile içindeki muhtelif eşyasını Safiye Hâtun bt. Abdülvehhâb’a hibe ettiği ve buna karşılık yüz kuruşluk bir yüzük ile şal aldığı Havâss-ı Kostantıniyye mahallâtından Câmi‘-i Kebîr mahallesinde sâkine fahrü’l-muhadderât Âmine bt. Hamza nâm hâtun tarafından husûs-ı âti’l-beyâna vekîl olup mezbûreyi ma‘rifet-i şer‘iyye ile ârifân olan Mehmed b. Bayezid ve Mustafa Çelebi b. Himmet şehâdetleri ile şer‘an vekâleti sâbite olan fahrü’l-akrân Hüseyin Ağa b. Mustafa mahfil-i kazâda işbu bâ‘isetü’l-kitâb Safiye Hâtun bt. Abdülvehhâb tarafından tasdîk-i âti’z-zikre vekîl-i sâbitü’l-vekâlesi olan zevci Mustafa Çelebi b. Mehmed Efendi mahzarında bi’l-vekâle ikrâr ve takrîr-i kelâm edip müvekkilem mezbûrenin silk-i mülkünde münselik olup mahalle-i mezbûrede vâki‘ bir tarafdan Debbâğzâde Mustafa Çelebi mülkü ve bir tarafdan Âişe Hâtun bt. Mehmed mülkü ve bir tarafdan Mehmed b. Ahmed ve Mustafa b. Süleyman mülkleri ve bir tarafdan tarîk-i âm ile mahdûd olup fevkānî ve tahtânî büyût-ı adîdeyi ve ahırı ve iki su kuyusunu ve zât-ı eşcâr-ı müsmire ve gayr-ı müsmire hadîkayı ve hadîkada su kuyusunu ve kenîfi müştemil olan mülk menzilini ve menzil-i mezbûrda hâlen mevcûd olan iki kaliçe ve bir acem keçesi ve iki yük perdesi ve beş kebe ve üç velense ve üç ihrâm ve bir orta Selânik keçesi ve sekiz yemeni yorgan ve iki serâser yorgan ve on iki kadife yastık ve iki tencere ve yirmi aded sahan ve üç küçük tepsi ve üç aded börek tepsisi ve bir büyük sini ve dört büyük güğüm ve iki küçük güğüm ve bir bakraç ve iki leğen ve üç ibrik ve bir seccâde ve dört minderini müvekkile-i mezbûre Safiye Hâtun’a hibe-i sahîha-i şer‘iyye ile hibe ve temlîk ve teslîm edip ol dahi eşyâ-i mezbûreyi alıp ve ba‘de’t-tahliyyeti’ş-şer‘iyye menzil-i mezkûru dahi ittihâb ve kabz ve kabûl eyledikden sonra müvekkile-i mezbûre Safiye Hâtun dahi hibe-i mezkûre mukābelesinde silk-i mülkünde münselik yüz kıt‘a riyâlî guruş kıymetli la‘l hâtem ve bir şâl-ı Keşmîrî ivaz verip ol dahi ahz ve kabûl eyledi ba‘de’l-yevm menzil-i mezbûr mezkûre Safiye Hâtun’un mülkü olup ve içinde olan eşyâ dahi mülk-i mevhûbudur keyfe mâ teşâ’ve tahtâr mutasarrıfa olsun müvekkilem mezbûre Âmine Hâtun’un kat‘â alâka ve medhali kalmadı dedikde gıbbe’t-tasdîki’ş-şer‘î vâki‘ü’l-hâl bi’t-taleb sebt olundu. Hurrire fî evâsıtı Cumâdelûlâ li sene erba‘a ve hamsîn ve elf. Şuhûdü’l-hâl: Fahrü’l-müderrisîni’l-kirâm Ali Efendi b. Mahmud el-kassâmü’l-askerî, Fahrü’l-mehâdimi’l-kirâm Mehmed Efendi b. Mezid Çelebi, Fahrü’l-hutebâ Abdullah Efendi b. Abdülkādir, Halil Bey b. Ferruh Efendi el-Kâtib, Abdurrahman b. Şeyh Musa, Mustafa Çelebi el-Cündî, Süleyman Halîfe b. Sünbül?, Süleyman Bey b. ( ), Halil b. Resul, Mehmed b. Yahya, Ahmed b. Mehmed, Süleyman Çelebi, Kâtibzâde Mustafa Çelebi, Abdullah b. Abdi ve gayruhüm mine’l-huzzâr