Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 206 Hüküm no: 221 Orijinal metin no: [42b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hasan Beşe b. Mehmed’in menzilinin yarı hissesini zevcesi Râziye bt. Maksud’a sattığı Havâss-ı Aliyye müzâfâtından Yenikapı hâricinde vâki‘ Merkez Efendi mahallesinde sâkin Hasan Beşe b. Mehmed nâm râcil meclis-i şer‘-i hatîr-i lâzımü’t-tevkīrde zevcesi işbu râfi‘atü’l-kitâb Râziye bt. Maksud nâm hâtun mahzarında bi’t-tav‘ ve’r-rızâ ikrâr ve takrîr-i kelâm edip akd-i âtî sudûruna değin silk-i mülk-i sahîh ve sarîhimde münselik olan emlâkimden mahalle-i mezbûrede vâki‘ bir tarafdan Hasan b. Abdullah mülkü ve bir tarafdan Âişe Hâtun bt. Abdullah mülkü ve bir tarafdan Ebûbekir b. Osman mülkü ve bir tarafdan tarîk-i âm ile mahdûd iki bâb tahtânî beyti ve sundurmayı ve bi’r-i mâyı ve kenîfi ve zât-ı eşcâr-ı müsmire ve gayr-ı müsmire bahçeyi müştemil mülk menzilimin nısf-ı şâyi‘ini zevcem ve halîlem mezbûre Râziye’ye bin sekiz yüz cedîd ceyyid râyic fi’l-vakt akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm ve ol dahi vech-i muharrer üzre iştirâ ve tesellüm eyledikden sonra semen-i mezbûrü’n-na‘t bin sekiz yüz akçeyi yedinden bi’t-tamâm ve’l-kemâl ahz u kabz eyledim, ba‘de’l-yevm mârrü’z-zikr menzilin nısf-ı şâyi‘i zevcem mezbûre Râziye’nin mülk-i müşterâ-yı sahîh ve sarîhidir keyfe mâ teşâ’ve tahtâr mutasarrıfa olsun dedikde mukırr-ı mezbûrun ber vech-i mübeyyen cârî ve sâdır olan ikrâr ve takrîrini el-mukarru lehü’l-mezbûre bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ gıbbe’l-ibtigā ketb ü tahrîr olundu. Hurrire fi’l-yevmi’t-tâsi‘ aşer min Cumâdelûlâ li sene erba‘a ve hamsîn ve elf. Şuhûdü’l-hâl: Muslihiddin Efendi b. Ahmed el-İmâm, Ahmed Halîfe b. Muslihiddin, İbrahim b. Abdullah, Mahmud Halîfe el-Müezzin, Abdullah b. Hasan, Mustafa Dede el-Kayyım, Yakub b. Kurd, Ali b. Mustafa, Mustafa b. Veli, Mustafa b. Ahmed ve gayruhüm