Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 207 Hüküm no: 222 Orijinal metin no: [42b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Emetullah bt. Abdi’nin kendisini boşayan Mahmud Efendi b. Hasan’dan mehir, nafaka ve diğer haklarını aldığı ve zimmetini ibrâ ettiği Medîne-i Ebâ Eyyûb-i Ensârî -radiye anhu Rabbühü’l-Bârî- mahallâtından İslâm Bey mahallesinde sâkine Emetullah bt. Abdi [nâm] hâtun meclis-i şer‘-i şerîf-i enver ve mahfil-i dîn-i münîf-i ezherde zevc-i mutallıkı işbu râfi‘ü’l-kitâb fahrü’l-eimmeti’l-kirâm Mahmud Efendi b. Hasan mahzarında bi’t-tav‘ ve’r-rızâ ikrâr ve takrîr-i kelâm edip bundan akdem zevcim merkūm Mahmud Efendi ile beynimizde şikāk vâki‘ olmağın beni talâk-ı bâyin ile tatlîk eylemişdi el-hâletü hâzihî ben dahi zimmetinde mütekarrir olan bin beş yüz ceyyid ve cedîd râyic fi’l-vakt akçe mehr-i müeccelemi ve beynimizde ilm-i şer‘î ile ma‘lûm nafaka-i iddetim ve me’ûnet-i süknâm olan üç yüz akçe hakkımı merkūm Mahmud Efendi’den yedinden bi’t-tamâm ve’l-kemâl ahz u kabz edip zevciyyete müte‘allik olan cemî‘ da‘vâ ve talebden merkūm Mahmud Efendi’nin zimmetini ibrâ-i âm ile ibrâ ve iskāt-ı tâm ile iskāt eyledim ba‘de’l-yevm bi’z-zât benden veyâhud bi’l-vekâle vekîlimden husûs-ı mezbûra müte‘allik da‘vâ ve nizâ‘ sudûr ederse lede’l-hükkâmi’l-kirâm mesmû‘a ve makbûle olmaya dedikde mukırr-ı mezbûrenin ber vech-i mübeyyen cârî ve sâdır olan ikrâr ve takrîrini el-mukarru lehü’l-mezbûr bi’l-muvâcehe tasdîk edicek mâ hüve’l-vâki‘ bi’t-taleb ketb olundu. Tahrîren fi’l-yevmi’l-ışrîn min Cumâdelûlâ li sene erba‘a ve hamsîn ve elf. Şuhûdü’l-hâl: Ali Efendi el-İmâm, Hüseyin b. Ali, Receb Efendi b. Abdi, Ali Efendi b. Hüseyin, İbrahim Çelebi b. Mustafa, el-Hâc Ahmed Beşe Çukadâr, Ali Beşe el-Muhzır ve gayruhüm mine’l-huzzâr