Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 209 Hüküm no: 224 Orijinal metin no: [43a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Andron’un Ahmed Dede b. İbrahim’den alacağını talep ettiği ve ödemesine hükmedildiği Kazâ-i Havâss-ı Aliyye -humiyet ani’l-âfât ve’l-beliyye- müzâfâtından Kağıthâne nâm karye sâkinlerinden olup çukacı tâifesinden işbu râfi‘ü’l-kitâb Andron v. ( ) nâm zimmî mahfil-i kazâya karye-i mezbûreden Ahmed Dede b. İbrahim nâm kimesneyi ihzâr ve mahzarında üzerine takrîr-i kelâm [ve] da‘vâ edip mezbûr Ahmed Dede’nin zimmetinde bundan akdem benden iştirâ ve kabz eylediği bir çift kara sığır öküzü bahâsından yirmi beş riyâlî guruş ve karz-ı şer‘îden on beş ki cem‘an kırk riyâlî guruş hakkımı suâl olunup alıverilmek matlûbumdur dedikde gıbbe’s-suâl cevâbında fi’l-hakīka müdde‘î-i mezbûrdan iştirâ eylediğim bir çift kara sığır öküzü bahâsından yirmi beş riyâlî guruş ve karz-ı şer‘îden on guruş cem‘an otuz beş riyâlî guruş zimmetimde lâzımü’l-edâ ve vâcibü’l-kazâ deynimdir dedikde ber mûceb-i ikrârihî meblağ-ı mezbûr otuz beş guruşun edâsına hüküm birle işbu hurûf bi’t-taleb ketb ve terkīm olundu. Hurrire fi’l-yevmi’s-sâmin aşer min Cumâdelûlâ li sene erba‘a ve hamsîn ve elf. Şuhûdü’l-hâl: Fahrü’l-kuzât Receb Efendi, Mustafa Beşe b. Mehmed el-Muhtesib, Ali Beşe b. Mustafa, Mustafa Beşe b. Veli min huddâm, İbrahim b. Mustafa, Hüseyin b. Ali min huddâm.