Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 210 Hüküm no: 226 Orijinal metin no: [43b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Armaga’nın babası İsterpo v. Andrik’ten miras kalan dükkânlarının kirasından amcasının tahsil ettiği beş senelik kirayı tamamen alarak zimmetini ibrâ ettiği Vilâyet-i Rumeli’nde Yenişehir kazâsı müzâfâtından Fener nâhiyesine tâbi‘ İstanifoz nâm karyede sâkin iken bundan akdem mürd olan İsterpo v. Andrik nâm zimmînin verâseti sulbî kebîr oğlu Armaga nâm şâbb-ı emrede münhasıra olduğu şer‘an zâhir oldukdan sonra mezbûr meclis-i şer‘-i şerîf-i lâzımü’t-tevkīrde işbu râfi‘ü’l-kitâb ammisi Aleksi v. Yani nâm zimmî muvâcehesinde bi’t-tav‘ ve’r-rızâ ikrâr ve takrîr-i kelâm edip bundan târih-i kitâba gelince ammim mezbûr Aleksi medîne-i Üsküdar’da Mihri[mah] Sultan Câmi‘-i şerîfi kurbunda vâki‘ babam hâlik-i mezbûr İsterpo’dan müntakil ve mevrûs nısf mumhâne ücretinden beher sene hâsıl olan beşer bin akçeden beş senede müctemi‘ olan yirmi beş bin akçe ve mahmiye-i Kostantıniyye hâricinde Eminönü’nde vâki‘ kezâlik nısf mumhâne ücretinden beher senede hâsıl olan on birer bin akçeden sinîn-i mezbûrede müctemi‘ olan elli beş bin akçe ki cem‘an beş senede seksen bin akçeyi ahz u kabz etmişdi el-hâletü hâzihî mezbûr Aleksi târih-i kitâba gelince beş senede makbûzu olan seksen bin râyic fi’l-vakt akçeyi yedinden bi’t-tamâm ve’l-kemâl ahz u kabz edip husûs-ı mezbûra müte‘allik da‘vâ ve talebden ammim mezbûrun zimmetini ibrâ-i âm ile ibrâ ve iskāt-ı tâm ile iskāt eyledim, ba‘de’l-yevm zikr olunan dükkânlar kirâsına müte‘allik benden bi’z-zât veyâhud bi’l-vekâle vekîlimden da‘vâ ve taleb sâdır ve zâhir olursa lede’l-hükkâmi’l-kirâm mesmû‘a ve makbûle olmaya dedikde mukırr-ı mezbûrun ber vech-i mübeyyen cârî ve sâdır olan ikrârını el-mukarru lehü’l-mezbûr bi’l-muvâcehe tasdîk ve bi’l-müşâfehe tahkīk etmeğin mâ hüve’l-vâki‘ bi’t-taleb ketb olundu. Tahrîren fi’l-yevmi’l-ışrîn min Cumâdelûlâ li sene erba‘a ve hamsîn ve elf. Şuhûdü’l-hâl: Fahrü’l-akrân Mustafa Çelebi el-Cündî, Hüseyin b. Sinan er-Râcil, el-Hâc Ahmed Beşe Çukadâr, İbrahim Çelebi min huddâm, Andriye v. Panayot, Atanaş v. İskarlet, Dimo v. Armaga, Andriye v. İskarlet, Hristo v. İstiko