Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 211 Hüküm no: 227 Orijinal metin no: [43b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ölen Hırso v. Yani’nin beytülmâle intikal eden iki bağının müzayede ile Yamandi v. Tıranoz’a satıldığı Kazâ-i Havâss-ı Aliyye’de emîn-i beytülmâl olan fahrü’l-emâcid ve’l-ekârim Ali Ağa b. Abdüddâim tarafından yedinde olan temessük mûcebince ber vech-i iltizâm beytülmâl-i hâssa cem‘ine vekîl ve emîn olan Hristoz v. Yazıcı nâm zimmî meclis-i şer‘-i hatîr-i lâzımü’t-tevkīrde ve’t-teşrîfde işbu hâmilü’l-kitâb Yamandi v. Tıranoz nâm zimmî mahzarında ikrâr ve takrîr-i kelâm edip kazâ-i mezbûre müzâfâtından Çekmece-i kübrâ’ya tâbi‘ Bigados nâm karye kürûmu ve sınırı dâhilinde vâki‘ bir tarafdan Karamanlı oğlu bağına ve bir tarafdan Hırsafi v. ( ) bağına ve bir tarafdan Nikola v. ( ) bağına müntehî birbirine mülâsık iki kıt‘a bağ bundan akdem karye-i mezbûrede hâlik olan Hırso v. Yani nâm zimmînin mülkü olup ba‘de helâkihî zâhirde zevce-i metrûkesi Angeliye bt. Dimo’dan gayrı vâris-i ma‘rûfu olmayıp muhallefâtının rub‘u merkūme Angeliye’ye ve selâse erbâ‘ı beytülmâle âid olup sâir muhallefâtından merkūme Angeliye hisse-i şer‘iyyesin alıp mârrü’z-zikr iki kıt‘a bağ beytülmâle râci‘ olmağın sûk-ı sultânîde mecâlis-i tâlibîn ve mehâfil-i râgibînde kirâren mirâren nidâ ve müzâyede olundukda on bin cedîd akçede merkūm Yamandi üzerinde karâr edip bir akçe ziyâde ile âhar tâlibi olmamağın zikr olunan iki kıt‘a bağı bi-cümleti’t-tevâbi‘ ve’t-tarâik ve kâffeti’l-hukūk ve’l-merâfık mersûm Yamandi’ye emânetim hasebiyle meblağ-ı mezbûr on bin akçeye bey‘-i bâtt-ı sahîh-i şer‘î ile bey‘ ve teslîm ve ol dahi ber vech-i meşrûh iştirâ ve tesellüm eyledikden sonra meblağ-ı mezbûru yedinden bi’t-tamâm ve’l-kemâl ahz u kabz eyledim ba‘de’l-yevm mesbûkü’z-zikr iki kıt‘a bağ mersûm Yamandi’nin mülk-i müşterâ-yı sahîh ve sarîhidir mutasarrıf olsun dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Tahrîren fi’l-yevmi’s-sâmin min Cumâdelûlâ li sene erba‘a ve hamsîn ve elf. Şuhûdü’l-hâl: Papa Rali? v. Na..?, Papa Andron v. Mihal, Papa Dimitri v. Papa Marko, Panayot v. Yani, Ergiri v. Yani, İstati v. Yorgi, Hristodolo v. Yorgi ve gayruhüm mine’l-hâzırîn