Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 212 Hüküm no: 228 Orijinal metin no: [44a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ali Beşe b. Abdullah’ın Kigo v. Hristo’ya ev hissesini sattığı ve tasarrufundaki tarla hisselerini devrettiği Vilâyet-i Rumeli’nde Ohri sancağında ( ) kazâsına tâbi‘ Trapezetençe nâm karyede sâkin Ali Beşe b. Abdullah meclis-i şer‘-i şerîf-i enver ve mahfil-i dîn-i münîf-i ezherde işbu râfi‘ü’l-kitâb Kigo v. Hristo nâm zimmî mahzarında bi’t-tav‘ ve’r-rızâ ikrâr ve takrîr-i kelâm edip akd-i âtî sudûruna değin silk-i mülk-i sahîh ve sarîhimde münselik emlâkimden karye-i mezbûre dâhilinde vâki‘ bir tarafdan Peçin v. Sarp nâm zimmî mülkü ve bir tarafdan Velo v. Tanaş nâm zimmî mülkü ve bir tarafdan kaya ve bir [tarafdan] tarîk-i âm ile mahdûd iki dip dut ağacını muhtevî bir bâb beyt-i süflîyi müştemil mülk menzilde olan nısf hisse-i şâyi‘amı mezbûr Kigo’ya beş yüz fıddî cedîd ve ceyyid râyic fi’l-vakt akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve ol dahi vech-i muharrer üzre iştirâ ettikden sonra ve yine karye-i mezbûre sınırı dâhilinde vâki‘ lede’l-ahâlî ve’l-cîrân ma‘lûmetü’l-hudûd taht-ı tasarrufumda olan tarlalarda dahi nısf hisse-i şâyi‘amın sâhib-i arz ma‘rifetiyle hakk-ı tasarrufunu mezbûr Kigo’ya beş yüz cedîd ve ceyyid râyic fi’l-vakt akçeye tefvîz edip ol dahi ber vech-i muharrer tefevvuz ve kabûl ettikden sonra mukābele-i bey‘ ve tefvîzde olan mezbûrü’n-na‘t bin akçeyi yedinden bi’t-tamâm ve’l-kemâl ahz u kabz edip menzil-i mezbûru ve mesbûkü’z-zikr tarlaları mahallinde kabz ve tasarrufa mersûm Kigo’yu taslît eyledim ba‘de’l-yevm mârrü’z-zikr menzilde olan nısf hisse-i şâyi‘a mezbûr Kigo’nun mülk-i müşterâ-yı sahîh ve sarîhidir ve tarlalarda olan nısf hisse-i şâyi‘a müfavvazıdır sâir emsâli gibi keyfe mâ yeşâ’ ve yahtâr mutasarrıf olsun dedikde mukırr-ı mezbûrun vech-i mübeyyen üzre cârî ve sâdır olan ikrârını el-mukarru lehü’l-mezbûr bi’l-muvâcehe tasdîk ve bi’l-müşâfehe tahkīk etmeğin mâ hüve’l-vâki‘ bi’t-taleb ketb olundu. Tahrîren fi’l-yevmi’l-ışrîn min Cumâdelûlâ li sene erba‘a ve hamsîn ve elf. Şuhûdü’l-hâl: Hüseyin Beşe b. Abdullah, Bayram Beşe b. Abdullah, Mustafa Beşe el-Muhtesib, İbrahim Beşe min huddâm, el-Hâc Ahmed Beşe Çukadâr ve gayruhüm mine’l-huzzâr