Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 252 Hüküm no: 267 Orijinal metin no: [33b-5] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İsmihan Hatun’un, vakıf odaları yanındaki duvar dibine yapılan helanın durumu hususunda Seyyid Mustafa Çelebi’yle anlaştığı Mahmiye-i İstanbul’da Darbhâne kurbunda Soğanağa mahallesi sâkinelerinden Saraylı İsmihan Hâtun bt. Abdullah tarafından husûs-ı âti’l-beyâna vekîl olduğu yedinde olan mazmûnu müsbet hüccet-i şer‘iyye ile şer‘an sâbite olan Râbia Hâtun bt. Abdullah ile müvekkile-i mezbûrenin zevci Bayram Beşe b. Receb nâm kimesneden her biri asâleten ve vekâleten meclis-i şer‘de câr-ı mülâsıkları olup Nişancı Paşa-yı Atîk evkāfından icâreteyn-i ma‘lûmeteyn ile bir bâb odanın mutasarrıfı olan es-Seyyid Mustafa Çelebi b. Yahya nâm kimesne mahzarında ikrâr ve takrîr-i kelâm edip merkūm es-Seyyid Mustafa Çelebi’nin hâlâ mutasarrıf olduğu odanın sâbıkan mutasarrıfı olan işbu hâzır bi’l-meclis Ali Beşe b. Şaban nâm kimesne beynimizde müşterek olan taş duvarın dibinde fevkānî bir edebhâne binâ ve ihdâs etmekle mâ-i necîsin neşfinden zikr olunan duvar münhedim olmak ihtimâli olmağın merkūm es-Seyyid Mustafa Çelebi’ye zikr olunan muhdes edebhâneyi kal‘ ve ref‘ edip zararını def‘ eyle dediğimizde beynimizde münâza‘ât-ı kesîre ve muhâsamât-ı şedîde vâki‘ olmuşidi el-hâletü hâzihî merhûm Ali Beşe zikr olunan edebhânenin kubûrunu mâ-i necîs neşf etmeyecek mertebe kendi malıyla şer‘an kireç ile binâ etmeğe ta‘ahhüd etmeğin ve her bâr ki zikr olunan duvar vech-i muharrer üzre mâ-i necîsin neşfinden yıkılırsa mezbûr es-Seyyid Mustafa Çelebi ile ale’l-iştirâk binâ etmeğe ta‘ahhüd edip bu vech üzre terâzi ve ibkā ve ittifâk etmişizdir dediklerinde, gıbbe’t-tasdîk vâki‘ü’l-hâl hıfzen li’l-makāl ketb olundu. Fi’l-yevmi’l-âşir min Cumâdelâhire li sene [10]77. Şuhûdü’l-hâl: Es-Seyyid Hasan Çavuş b. es-Seyyid Ali, es-Seyyid Hasan b. es-Seyyid Nuh, Mehmed Beşe b. Şaban, Şükrullah Bey b. Mustafa.