Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 252 Hüküm no: 268 Orijinal metin no: [34a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ali Ağa b. Şaban’ın evini Pilaşe bt. Yorgi’ye sattığı Mahmiye-i İstanbul’da Sultan Selim kurbunda Mehmed Ağa mahallesi ahâlîsinden Ali Ağa b. Şaban tarafından husûs-ı âti’l-beyâna vekîl olduğu Mehmed Efendi b. Şaban ve Dilâver Bey b. Abdullah nâm kimesneler şehâdetleri ile şer‘an sâbit olan Abdülbâkī Çelebi b. Mustafa nâm kimesne meclis-i şer‘-i şerîf-i lâzımü’t-teşrîfde bâ‘isetü’s-sifr Pilaşe bt. Yorgi nâm nasrâniye mahzarında ikrâr ve takrîr-i kelâm edip müvekkilim mezbûr Mehmed Ağa akd-i âtî sudûruna değin yedinde mülkü ve hakkı olup mahrûse-i Galata a‘mâlinden kasaba-i Beşiktaş’a tâbi‘ Arnavudköyü nâm karyede vâki‘ bir tarafdan mezbûr Pilaşe mülkü ve bir tarafdan Kostantin Reis mülkü ve bir tarafdan Hürmüz Reis mülkü ve bir tarafdan tarîk-i âm ile mahdûd ve tabaka-i ulyâsında iki bâb oda ve bir matbah ve bir kenîf ve tabaka-i vustâsında bir bâb oda ve bir sofa ve tabaka-i süflâsında bir ahır ve muhavvatayı müştemil menzili tarafeynden îcâb ve kabûlü hâvî bey‘-i bâtt-ı kat‘î ile mezbûre Pilaşe’ya üç yüz altmış kıt‘a esedî guruşa bey‘ ve teslîm edip ol dahi iştirâ ve tesellüm ettiğinden sonra semen-i mezbûru yedinden ahz u kabz eyledi min ba‘d menzil-i mezbûr merkūme Pilaşe’nın mülk-i müşterâsıdır keyfe mâ teşâ’ ve tahtâr mutasarrıfe olsun dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’l-hâdî aşer min Cumâdelâhire li sene seb‘a ve seb‘în ve elf. Şuhûdü’l-hâl: Hacı Mehmed b. Abdullah, Mehmed Efendi b. ( ) el-İmâm, İsmail Ağa b. Ali, Hüseyin Çelebi b. Abdi, Abdi Bey b. ( ).