Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 213 Hüküm no: 229 Orijinal metin no: [44a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ali Bey tarafından yakalanan Yusuf b. Abdullah’ın kaçak köle olduğu ve sahibi bulununcaya kadar nafaka takdir edildiği Medîne-i Ebâ Eyyûb-i Ensârî -radiye anhu Rabbühü’l-Bârî-’de hâlen subaşı ve zâbitü’l-avâbık râgibü hâze’l-kitâb Ali Bey b. ( ) mahfil-i kazâda orta boylu çatık kaşlı gök elâ gözlü karayağız kara bıyıklı Yusuf b. Abdullah nâm şâbbı ihzâr ve mahzarında takrîr-i kelâm edip merkūm Yusuf abd-i âbık olup merkūmu medîne-i mezbûrede vâki‘ Topçular nâm mahallede ahz eyledim suâl olunmak taleb ederim dedikde gıbbe’s-suâl merkūm Yusuf cevâbında fi’l-hakīka ben İstanbul’da Atpazarı’nda sâkin canbâz tâifesinden Karaca demekle ma‘rûf Receb Bey b. ( ) nâm kimesnenin abd-i memlûkü olup mülkünden ibâk eyledim deyû rık ve ibâkını bi’t-tav‘i’s-sâf ikrâr ve i‘tirâf eyledikde gulâm-ı mersûm sâhibi zuhûr edinceye dek yevmî beşer akçe nafaka takdîr olunup merkūm Ali Bey’e teslîm olundu. Tahrîren fi’l-yevmi’t-tâsi‘ aşer min Cumâdelûlâ li sene 1054. Şuhûdü’l-hâl: El-Hâc Ahmed Beşe Çukadâr, Mustafa Beşe el-Muhtesib, Ali Beşe b. Mustafa, İbrahim Çelebi, Hüseyin Çelebi ve gayruhüm