Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 213 Hüküm no: 230 Orijinal metin no: [44a-3, Arapça] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Âmine bt. Mustafa’nın vasîsi Ali Çelebi b. İbrahim’in hıyâneti tespit edildiğinden yerine amcası Ömer Beşe b. Osman’ın vasî tayin edildiği Bundan akdem babası medîne-i Ebâ Eyyûb el-Ensârî -aleyhi rahmetü Rabbihi’l-Bârî- mahallâtından İdrisköşkü mahallesinde sâkin iken müteveffâ olan Âmine bt. Mustafa nâm sagīrenin tesviye-i umûruna kıbel-i şer‘-i şerîfden mansûb vasîsi olan Ali Çelebi b. İbrahim nâm kimesnenin hıyâneti zâhir olup tahakkuk ettikde hâkim-i muvakki‘u a‘lâhu hâze’l-kitâb bi-tevkī‘ihi’ş-şerîfi’l-müstetâb tarafından yerine başka bir vasî ta‘yîn edilmesine muhtâc olmağın evân-ı rüşd ve bülûğuna değin ahvâlini zabt ve sagīre-i merkūmeye müteveffâ-yı mezbûr babasından irs-i şer‘î ile intikāl eden emvâlini hıfz için emânet ile mevsûf ve sıyânet ile ma‘rûf olması sebebiyle hâmil-i hâze’l-kitâb sagīre-i mezbûrenin amcası olan Ömer Beşe b. Osman’ı yerine vasî ta‘yîn etmeğin ol dahi vesâyet-i mezbûreyi kabûl edip umûrunu ikāme etmeyi mültezim oldukda nasben ve kabûlen sahîhayn-i şer‘iyyeyn [kayd olundu]. Cerâ zâlike ve hurrire fi’l-yevmi’r-râbi‘ aşer min Cumâdelûlâ li sene erba‘a ve hamsîn ve elf. Şuhûdü’l-hâl: Ömer Beşe b. Ali er-Râcil, Ahmed Çelebi b. Zülfikār, Ali Çelebi b. İbrahim er-Râcil, Mahmud b. Ahmed, el-Hâc Ahmed Beşe Çukadâr, Mustafa Beşe b. Mehmed, Ali Beşe b. Mustafa, Hüseyin Çelebi min huddâm ve gayruhüm