Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 214 Hüküm no: 231 Orijinal metin no: [44a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Âmine bt. Mustafa’ya vasî tayin edilen Ömer Beşe b. Osman’ın eski vasî Ali Çelebi b. İbrahim’in zimmetinde bulunan Âmine’nin parasını talep ettiği Medîne-i Ebâ Eyyûb-i Ensârî -radiye anhu Rabbühü’l-Bârî- mahallâtından İdris Köşkü mahallesinde sâkin iken bundan akdem fevt olan Mustafa Beşe b. Osman nâm müteveffânın sulbiye kızı Âmine nâm sagīrenin kıbel-i şer‘den mansûb vasîsi ve li ebeveyn ammisi olan bâ‘isü’l-kitâb Ömer Beşe b. Osman nâm kimesne meclis-i şer‘-i hatîr-i lâzımü’t-tevkīrde mukaddemâ sagīre-i mezbûrenin kıbel-i şer‘den mansûb vasîsi olan Ali Çelebi b. İbrahim mahzarında üzerine da‘vâ ve takrîr-i kelâm edip sagīre-i mezbûreye babası müteveffâ-yı mezbûr Mustafa Beşe’den ber mûceb-i defter-i kassâm on üç bin üç yüz cedîd ve ceyyid râyic fi’l-vakt akçe isâbet eyleyip mezbûrdan vesâyeti hasebiyle sekiz bin akçe ahz u kabz eylemişdi. Hâlen mezbûr Ali Çelebi vesâyet-i mezbûreden azl olunup yerine ben vasî olmağın vesâyetim hasebiyle meblağ-ı mezbûr sekiz bin akçeyi bana alıverilmesini taleb ederim dedikde gıbbe’s-suâl cevâbında fi’l-vâki‘ sagīre-i mezbûrenin babasından kendiye isâbet eden on üç bin üç yüz akçesinden sekiz bin akçesini benim zimmetimde lâzımü’l-edâ ve lâzımü’l-kazâ deynimdir deyû ikrâr ve i‘tirâf eylemeğin ber mûceb-i ikrârihî meblağ-ı mezbûrun edâsına tenbîh-i şer‘î birle mâ hüve’l-vâki‘ gıbbe’l-ibtigā sebt ve imlâ olunup men lehü’t-taleb yedine def‘ olundu. Hurrire fi’l-yevmi’r-râbi‘ aşer min Cumâdelûlâ li sene erba‘a ve hamsîn ve elf. Şuhûdü’l-hâl: Hamza Beşe b. Ali er-Râcil, Ahmed Çelebi b. Zülfikār, Ali Çelebi b. İbrahim er-Râcil, el-Hâc Ahmed Beşe b. ( ) Çukadâr, Ali Beşe b. Mustafa, Süleyman b. Turgud ve gayruhüm mine’l-hâzırîn