Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 215 Hüküm no: 233 Orijinal metin no: [44b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yorgi v. İsterpod’un vekili olduğu Yorgaki’nin Andriye v. Panayot’daki alacağını talep ettiği, daha önce ödendiği iddiası ve davadan men edildiği Mahmiye-i İstanbul hısnı ebvâbından Fenerkapısı hâricinde sâkin Yorgaki v. ( ) nâm zimmî tarafından husûs-ı âti’z-zikri vekîl olup hasm-ı câhid-i şer‘î muvâcehesinde bimâ hüve nehcü’s-sübût vekâleti sâbite olan Yorgi v. İsterpod nâm zimmî işbu râfi‘ü’l-kitâb Andriye v. Panayot nâm mumcuyu mahfil-i kazâya ihzâr ve mahzarında üzerine takrîr-i kelâm [ve] da‘vâ edip müvekkilim mezbûr Yorgaki’nin mersûm Andriye zimmetinde deyn-i şer‘îden dokuz yüz râyic fi’l-vakt akçe hakkı olup beni meblağ-ı mezbûru ahza tarafından vekîl eylemeğin vekâletim hasebiyle alıverilmesi matlûbumdur dedikde gıbbe’s-suâl mezbûr Andriye cevâbında fi’l-vâki‘ deyn-i şer‘îden minvâl-i muharrer üzre mezbûr Yorgaki’ye dokuz yüz akçe deynim vâridi lâkin meblağ-ı mezbûru bundan akdem mezbûr Yorgi mersûm Yorgaki tarafından gelip benden taleb eylediğinde ben dahi meblağ-ı mezbûr dokuz yüz akçeyi merkūm Yorgaki için mezbûr Yorgi’ye bi’t-tamâm ve’l-kemâl edâ ve teslîm eyledim dedikde gıbbe’s-suâl ve’l-inkâr ve akībe’l-istişhâd ityân-ı beyyineden izhâr-ı acz edip istihlâf eyledikde merkūm Yorgi dahi yemînden nükûl eylemeğin mu‘ârazadan men‘ birle işbu hurûf bi’t-taleb ketb olundu. Tahrîren fi’l-yevmi’s-sâmin aşer min Cumâdelûlâ li sene erba‘a ve hamsîn ve elf. Şuhûdü’l-hâl: Fahrü’l-emsâl Receb Efendi, Mustafa Beşe b. Mehmed min huddâm, Ali Beşe b. Mustafa huddâm, Mustafa Çelebi b. ( ) ve gayruhüm mine’l-huzzâr