Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 215 Hüküm no: 234 Orijinal metin no: [44b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İsak v. David’in evini David v. Yasef’e bey‘ bi’l-vefâ ile sattığı ve bir yıl içinde bedelini ödeyip geri almazsa satışın kesin satış (bey‘-i bât) olacağı Havâss-ı Refî‘a -humiyet ani’l-âfât ve’l-beliyye- kazâsı müzâfâtından Hasköy demekle ma‘rûf kasaba mahallâtından Keçeci mahallesinde sâkin İsak v. David nâm Yahudi meclis-i şer‘-i hatîr-i lâzımü’t-tevkīrde işbu hâmil-i hâze’l-kitâb David v. Yasef nâm Yahudi muvâcehesinde bi’t-tav‘ ve’r-rızâ ikrâr ve i‘tirâf ve takrîr-i kelâm edip akd-i âtî sudûruna değin silk-i mülkümde münselik olan emlâkden mahalle-i mezbûrede vâki‘ bir tarafdan Kohi v. ( ) nâm Yahudi mülküne ve bir tarafdan vâdi ve iki tarafdan tarîk-i âma müntehî dört bâb fevkānî ve dört bâb tahtânî beyti ve sofayı ve bi’r-i mâyı ve kenîfi ve zât-ı eşcâr-ı müsmire ve gayr-ı müsmire muhavvatayı müştemil mülk menzilimi cümle tevâbi‘ ve levâhıkı ve âmme-i menâfi‘ ve merâfıkı ile merkūm David’e târih-i kitâbdan bir sene tamâmına değin müeccel bey‘ bi’l-vefâ tarîkiyle iki yüz yirmi kıt‘a riyâlî guruşa bey‘ edip kabz-ı semen ve teslîm-i mebî‘-i mahdûd kıldım ba‘de’l-yevm ecel-i mev‘ûd tamâmına değin meblağ-ı mersûmu merkūm David’e edâ ve teslîm edemezsem bey‘-i mezbûr bâtta münkalib olsun dedikde mukırr-ı mezbûrun vech-i mübeyyen üzre cârî olan ikrâr ve takrîrini el-mukarru lehü’l-mezbûr David bi’l-muvâcehe tasdîk ettikden sonra menzil-i mezbûrun derkine ve meblağ-ı mersûmun cümlesine mahalle-i mezbûrede sâkin Kemal v. Kemal nâm Yahudi emr-i kabûlü hâvî kefâlet ile kefîl olmağın mâ hüve’l-vâki‘ gıbbe’l-ibtigā sebt ve imlâ olundu. Hurrire fi’l-yevmi’s-sânî ve’l-ışrîn min Cumâdelûlâ li sene erba‘a ve hamsîn ve elf. Şuhûdü’l-hâl: Mustafa Beşe b. Mehmed el-Muhtesib, Ali Beşe b. Mustafa, Hüseyin Çelebi b. Ali, Mustafa Çelebi b. Veli ve gayruhüm mine’l-huzzâr