Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 216 Hüküm no: 235 Orijinal metin no: [44b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Meteçso v. Setafo’nun Pano v. Piyo’ya bir parça mülk bağını sattığı ve tasarrufundaki bir parça tarlayı devrettiği Vilâyet-i Rumeli’nde Premedi kazâsına tâbi‘ Prakar nâm karye sâkinlerinden Meteçso v. Setafo nâm zimmî meclis-i şer‘-i hatîr-i lâzımü’t-tevkīrde işbu hâmilü’l-kitâb Pano v. Piyo nâm zimmî muvâcehesinde bi’t-tav‘ ve’r-rızâ ikrâr ve i‘tirâf ve takrîr-i kelâm edip akd-i âtî sudûruna değin silk-i mülkümde münselik olan emlâkden karye-i mezbûre bağları dâhilinde vâki‘ bir tarafdan müşterî-i mezbûr Pano bağına ve bir tarafdan Peho v. İstirati bağına ve bir tarafdan Minho v. Kigo bağına ve bir tarafdan tarîk-i âma müntehî tahmînen bir çapalık bir kıt‘a mülk bağımı cümle tevâbi‘ ve levâhıkı ve âmme-i menâfi‘ ve merâfıkı ile merkūm Pano’ya dört yüz fıddî cedîd ceyyid râyic fi’l-vakt akçeye bey‘-i bâtt-ı sahîh-i şer‘î ile [bey‘] ve kabz-ı semen edip mebî‘-i mezkûru mahallinde kabza müşterî-i merkūmu taslît eylediğimden sonra yine karye-i mezbûre sınırı dâhilinde vâki‘ iki tarafdan yine müşterî-i mezbûr Pano tarlasına ve bir tarafdan Kiro v. Lilo tarlasına ve bir tarafdan Kirko v. Kanoş tarlasına müntehî diyârımız keyli ile tahmînen iki keyl tohum isti‘âb eder bir kıt‘a tarlanın hakk-ı tasarrufunu sâhib-i arz ma‘rifetiyle merkūm Pano’ya tefvîz edip ol dahi tefevvuz ve kabûl ettikden sonra mukābele-i tefvîzde olan bin nakd-i mezbûrü’n-na‘t akçeyi merkūm Pano yedinden bi’t-tamâm ve’l-kemâl ahz u kabz eyledim ba‘de’l-yevm zikr olunan bir kıt‘a bağ mersûmun Pano’nun mülk-i müşterâsıdır ve mârrü’z-zikr bir kıt‘a tarla dahi mersûmundur sâir emsâli tasarrufu gibi mutasarrıf olsun dedikde mukırr-ı mezbûrun minvâl-i muharrer üzre cârî olan ikrâr ve takrîrini el-mukarru lehü’l-mezbûr Pano bi’l-muvâcehe tasdîk edicek mâ hüve’l-vâki‘ gıbbe’t-taleb ketb olundu. Hurrire fi’l-yevmi’s-sâmin aşer min Cumâdelûlâ li sene erba‘a ve hamsîn ve elf. Şuhûdü’l-hâl: Hasan Beşe b. Oruc, Sinan Beşe b. Abdullah, Mustafa Beşe el-Muhtesib, Ali Beşe min huddâm, Kiro v. Lilo, Dado [v.] Lasko ve gayruhüm mine’l-huzzâr