Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 253 Hüküm no: 269 Orijinal metin no: [34a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ölen Yorgi’nin çocukları için nafaka takdir edildiği Nafaka-i nasrâniyeye, her birine yirmişer akçe yevmiye Mahrûse-i Galata mahallâtından Sultan Bayezid mahallesinde olup bundan akdem hâlik olan Yorgi v. [Kiryazi] nâm zimmînin zevcesi Pilaşe bt. Kosta nâm nasrâniye meclis-i şer‘-i şerîfde takrîr-i kelâm edip hâlik-i mezbûrun benden tevellüd edip hâlâ taht-ı hidânemde olan Despina ve Sultana nâm sagīrlere babaları hâlik-i mezbûrdan kendilere intikāl eden mallarından bi kadri’l-kifâye nafaka takdîr olunmak taleb ederim dedikde kıbel-i şer‘den her birine yevmî yirmi beşer akçe farz ve takdîr olunup vakt-i zarûretde istidâne ve lede’z-zafer rücû‘a izin birle mâ vaka‘a gıbbe’t-taleb ketb olundu. Fi’l-yevmi’s-sânî aşer min Cumâdelâhire li sene seb‘a ve seb‘în ve elf. Şuhûdü’l-hâl: Ahmed Çelebi b. Abdullah, Mehmed Çavuş b. Hüseyin, Yako v. Yani, Yamandi v. Mano, Mihayil v. Nikola.