Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 220 Hüküm no: 241 Orijinal metin no: [45b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed b. Abdullah’ın Dimo v. Minho ile ortak olarak Ali Beşe b. Abdullah’tan koyun aldıkları ve Dimo’nun kendi payına düşen borcu ödemekten kaçındığı iddiasını ispat edemediği Mahmiye-i İstanbul’da Karabaş mahallesinde sâkin Mehmed b. Abdullah çoban tâifesinden işbu râfi‘ü’l-kitâb Dimo v. Minho nâm zimmîyi mahfil-i kazâya ihzâr ve mahzarında üzerine takrîr-i kelâm [ve] da‘vâ edip bundan akdem işbu hâzır bi’l-meclis olan Ali Beşe b. Abdullah nâm kimesneden mezbûr Dimo ile ma‘an ale’l-iştirâki’s-seviy beher re’s kuzusu ile yüz ellişer akçeye olmak hesâbı üzre seksen re’s koyun kuzusu ile on bir bin altı yüz seksen akçeye iştirâ ve tesellüm edip semen-i mezbûrdan iki bin dört yüz akçesini merkūm Ali Beşe’ye edâ ve teslîm edip dokuz bin iki yüz seksen akçesini zimmetimizde mütekarrir deynimiz iken hâlen mezbûr Dimo ale’l-iştirâki’s-seviy mârrü’z-zikr koyun bahâsından zimmetine lâzım gelen dört bin altı yüz kırk akçenin edâsında ta‘allül eder, suâl [olunup] alıverilmesi matlûbumdur dedikde gıbbe’s-suâl ve akībe’l-inkâr müdde‘î-i mezbûrdan da‘vâsına mutâbık beyyine taleb olundukda ityân-ı beyyineden izhâr-ı acz ile istihlâf etmeğin mezbûr Dimo dahi merkūm Mehmed ile ma‘an ale’l-iştirâki’s-seviy beher re’si kuzusu ile yüz ellişer akçeye olmak hesâbı üzre seksen re’s koyunuyla kuzusu ile merkūm Ali Beşe’den on bir bin altı yüz seksen akçeye iştirâ ve tesellüm eylemediğine yemîn billâhi’llezî enzele’l-İncîle alâ İsâ -aleyhi’s-selâm- edicek mu‘ârazadan men‘ birle işbu hurûf bi’t-taleb ketb olundu. Tahrîren fi’l-yevmi’l-hâmis ve’l-ışrîn min Cumâdelûlâ li sene erba‘a ve hamsîn ve elf. Şuhûdü’l-hâl: Ahmed Beşe Çukadâr, Mustafa Beşe el-Muhtesib, Ali Beşe Serbölük, Mustafa b. Veli min huddâm, İbrahim Çelebi b. ( ) min huddâm, Hüseyin Çelebi b. Ali, Hasan b. Ali, Baba Süleyman b. Turgud ve gayruhüm mine’l-hâzırîn