Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 222 Hüküm no: 244 Orijinal metin no: [46a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Merhûm Hâfız Ali Efendi’nin yetimlerinin vasîsi Şeyh Abdullah Efendi vesayeti yerine getiremediği için ferâgat edip yerine anneleri Âmine Hâtun bt. Abdullah’ın vasî tayin edildiği Medîne-i Ebâ Eyyûb-i Ensârî -radiye anhu Rabbühü’l-Bârî- mahallâtından Bıçakçı Ferhad mahallesinde sâkin iken bundan akdem fevt olan merhûm Hâfız Ali Efendi’nin evlâd-ı sıgārı Mehmed ve Mustafa ve Havvâ’nın kıbel-i şer‘den mansûb vasîleri olan umdetü’l-meşâyihi’l-izâm, zübdetü’l-etkıyâi’l-kirâm eş-Şeyh Abdullah Efendi b. el-merhûm İsâ Efendi hıdemât-ı vesâyeti ikāmetden âciz olmağla vesâyet-i merkūmeden ferâğ edip yerine bir vasî nasb olunmak lâzım ve mühim olmağın sıgār-ı mezkûrûn Mehmed ve Mustafa ve Havvâ’nın vâlideleri Âmine Hâtun bt. Abdullah vesâyet-i mezbûreye ehil olmağın hâlen sıgār-ı mezkûrûnun ahvâlini zabt ve emvâlini hıfz için cânib-i şer‘-i kavîmden vasî nasb ve ta‘yîn olundukdan sonra vasiyye-i mezkûre Âmine Hâtun meclis-i şer‘-i hatîr-i lâzımü’t-tevkīrde işbu râfi‘ü’l-kitâb müşârün-ileyh eş-Şeyh Abdullah Efendi mahzarında bi’l-vesâye ikrâr ve takrîr-i kelâm edip sıgār-ı merkūmûna babaları müteveffâ-yı mezbûrdan irs-i şer‘î ile intikāl edip vasiyy-i mûmâ-ileyh eş-Şeyh Abdullah Efendi’nin yedinde mazbût olan mâl-ı mevrûslarından vilâyet-i Anadolu’da medîne-i Amasya’da Çörekçi mahallesinde vâki‘ menzil bahâsından doksan yedi kıt‘a esedî guruş ve mütevellî yedinden ahz olunan kırk beş kıt‘a riyâlî guruş ve sâir nukūd ve menkūlâtdan mûmâ-ileyh eş-Şeyh Abdullah Efendi’nin vesâyet-i mahkiyesi hasebiyle makbûzu olan on bin üç yüz elli fıddî cedîd ceyyid râyic fi’l-vakt akçeyi hâlen vesâyetim hasebiyle mezbûr eş-Şeyh Abdullah yedinden bi’t-tamâm ve’l-kemâl ahz u kabz eyledim, min ba‘d sıgār-ı mezkûrûna babalarından irs-i şer‘î ile intikāl edip müşârün-ileyh eş-Şeyh Abdullah Efendi’nin makbûzu olan malların mûmâ-ileyh zimmetinde bir akçe ve bir habbe bâkī kalmadı dedikde mukırra-i mezbûre Âmine Hâtun’un vech-i mübeyyen üzre cârî ve sâdır olan ikrâr ve takrîrini el-mukarru lehü’l-mezbûr Abdullah Efendi bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ gıbbe’l-ibtigā sebt ve imlâ olundu. Hurrire fi’l-yevmi’r-râbi‘ ve’l-ışrîn min Cumâdelûlâ li sene erba‘a ve hamsîn ve elf. Şuhûdü’l-hâl: Fahrü’l-müderrisîni’l-kirâm Ebussuûd Efendi eş-şehîr bi-Şa‘rânîzâde, Yusuf Halîfe b. Kasım el-İmâm, Mehmed Bey b. Ali el-Müezzin, Hasan Bey b. Mehmed el-Cündî, Mehmed Ağa b. Mustafa el-Bevvâbü’s-sultânî, Kasım b. Halil, Ali Bey b. ( ), Musa b. Ali ve gayruhüm mine’l-huzzâr