Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 223 Hüküm no: 245 Orijinal metin no: [46a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Rizor v. Şiro’nun menzilini Şiro v. Nikola’ya sattığı ve bedelini tahsil ettiği Vilâyet-i Rumeli’nde kazâ-i Yenişehir müzâfâtından Kuhistân nâhiyesine tâbi‘ Ayatrala [Ayadıranda] nâm karyeden Rizor v. Şiro nâm zimmî meclis-i şer‘-i hatîr-i lâzımü’t-tevkīrde işbu hâmilü’l-kitâb Şiro v. Nikola nâm zimmî muvâcehesinde bi’t-tav‘ ve’r-rızâ ikrâr ve takrîr-i kelâm edip akd-i âtî sudûruna değin silk-i mülkümde münselik olan emlâkimden karye-i mezbûrede vâki‘ bir tarafdan Mustafa Beşe b. Abdullah nâm râcil mülküne ve bir tarafdan Mustafa Beşe b. Abdülmennân bostanına ve bir tarafdan Tolo v. Nikola mülküne ve bir tarafdan tarîk-i âm ile mahdûd bir tahtânî beyti ve zât-ı eşcâr-ı müsmire ve gayr-ı müsmire muhavvatayı müştemil mülk menzilimi cümle tevâbi‘ ve levâhıkı ve âmme-i menâfi‘ ve merâfıkı ile merkūm Şiro’ya bin sekiz yüz elli fıddî cedîd ceyyid râyic fi’l-vakt akçeye bey‘-i bâtt-ı sahîh-i şer‘î ile bey‘ ve kabz-ı semen edip mebî‘-i mezkûru mahallinde kabza müşterî-i merkūmu taslît eyledim, ba‘de’l-yevm menzil-i mahdûd-ı mezkûr merkūm Şiro’nun mülk-i müşterâ-yı sarîhidir keyfe mâ yeşâ’ ve yahtâr mutasarrıf olsun dedikde mukırr-ı mezbûrun vech-i mübeyyen üzre cârî ve sâdır olan ikrâr ve takrîrini el-mukarru lehü’l-mezbûr Şiro bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ gıbbe’l-ibtigā sebt ve imlâ olundu. Hurrire fi’l-yevmi’r-râbi‘ ve’l-ışrîn min Cumâdelûlâ li sene erba‘a ve hamsîn ve elf. Şuhûdü’l-hâl: Mustafa Beşe el-Muhtesib, Ali Beşe min huddâm, Hüseyin Çelebi b. Ali Beşe, Baba Süleyman b. Turgud, Yorgi [v.] İstemad, Yorgi [v.] Nikola, Rizo [v.] Avyori, Mavrodi [v.] Nikola, Yorgi [v.] Tanaş, Yorgi [v.] Nikola, Petko [v.] Yani, Yani [v.] Mavrodi, Şiro [v.] Nikola, Yani [v.] Danili, Todori [v.] Nikola, Doroso [v.] Danili ve gayruhüm mine’l-huzzâr