Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 224 Hüküm no: 247 Orijinal metin no: [46b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. David v. Senamo’nun menzildeki yarım hissesini kardeşinin oğlu Niko v. Dimo’ya hibe ettiği ve tasarrufundaki dört kıt‘a tarladaki yarım hissesini bedeliyle devrettiği Vilâyet-i Rumeli’nde Yanya sancağında Koniçe kazâsına tâbi‘ Velesin nâm karyeden David v. Senamo nâm zimmî meclis-i şer‘-i hatîr-i lâzımü’t-tevkīrde li ebeveyn karındaşı oğlu işbu hâmilü’l-kitâb Niko v. Dimo muvâcehesinde bi’t-tav‘i’s-sâf ikrâr ve takrîr-i kelâm edip karye-i mezbûrede vâki‘ bir tarafdan vâdi ve bir tarafdan tarîk-i âma müntehî bir bâb tahtânî beyti ve bir zât-ı eşcâr-ı müsmire ve gayr-ı müsmire muhavvata[yı] müştemil mülk menzilden ve menzil-i mezbûr dâhilinde vâki‘ altı aded fıçı ve bir çift kara sığır öküzü ve bir hımar ve sâir esâs-ı beytden ve karye-i mezbûre bağları dâhilinde vâki‘ inde ahâliyi’d-diyâr her biri ma‘lûmü’l-hudûd ve’l-mikdâr tahmînen üç çapalık üç kıt‘a bağdan ve mevâzi‘-i adîdede vâki‘ yirmi dip ceviz ve armut ve dut eşcârından nısf hisse-i şer‘iyye-i şâyi‘asını merkūm Niko’ya hibe-i sahîha-i şer‘iyye ile hibe ve temlîk ve ol dahi meclis-i hibede kabz ve ittihâb ve temellük eyledikden sonra zikr olunan hissesini mahallinde kabza merkūm Niko’yu taslît eyledim, ba‘de’l-yevm nısf hisse-i mezkûre mezbûr Niko’nun mülk-i mevhûbudur keyfe mâ yeşâ’ ve yahtâr mutasarrıf olsun dedikden sonra yine karye-i mezbûre sınırı dâhilinde vâki‘ lede’l-ahâlî ve’l-cîrân ma‘lûmü’l-hudûd on dört kıt‘a tarladan nısf hisse-i şer‘iyye-i şâyi‘asının hakk-ı tasarrufun dahi sâhib-i arz ma‘rifetiyle mezbûr Niko’ya beş yüz akçeye tefvîz edip ol dahi vech-i mübeyyen üzre tefevvuz ve kabûl ettikden sonra mukābele-i tefvîzde olan meblağ-ı mârrü’n-na‘t beş yüz akçeyi merkūm Niko yedinden bi’t-tamâm ve’l-kemâl ahz u kabz eyledim, ba‘de’l-yevm zikr olunan on dört kıt‘a tarladan nısfının hakk-ı tasarrufu mersûmun[dur] sâir emsâli tasarrufu gibi mutasarrıf olsun dedikde mukırr-ı mezbûrun minvâl-i muharrer üzre cârî ve sâdır olan ikrâr ve takrîrini el-mukarru lehü’l-mezbûr Niko bi’l-muvâcehe tasdîk edicek mâ hüve’l-vâki‘ bi’t-taleb ketb olundu. Hurrire fi’l-yevmi’l-hâmis ve’l-ışrîn min Cumâdelûlâ li sene erba‘a ve hamsîn ve elf. Şuhûdü’l-hâl: Ahmed b. Süleyman, Mustafa Beşe el-Muhtesib, Ali Beşe b. Mustafa, Hüseyin Çelebi min huddâm, Baba Süleyman min huddâm, Mano v. Laka, Koka [v.] Dimo, Minho [v.] İstamo, Koço [v.] Daro, Rosta [v.] Este, Kirko [v.] Kigo ve gayruhüm mine’l-huzzâr