Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 253 Hüküm no: 270 Orijinal metin no: [34a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Pilaşe bt. Kosta’nın ölen kocasından kendisine olan mehir ve sairden olan borcu hususundaki davada sulh olduğu Medîne-i Galata mahallâtından Sultan Bayezid mahallesinde sâkin iken bundan akdem hâlik olan Yorgi v. Kiryazi nâm zimmînin verâseti zevce-i metrûkesi Pilaşe bt. Kosta nâm nasrâniye ile sulbiye sagīre kızları Despina ve Sultana’ya münhasıra olduğu şer‘an zâhir ve mütehakkik oldukdan sonra merkūm[e] Pilaşe meclis-i şer‘-i hatîr-i lâzımü’t-tevkīrde sagīretân-ı mezbûretânın tesviye-i umûrlarına kıbel-i şer‘-i enverden mansûb vasîleri ve terekesine vâzı‘ü’l-yed olan Diyafle v. Mihalaki nâm zimmî muvâcehesinde ikrâr ve takrîr-i kelâm edip zevcim hâlik-i mezbûr Yorgi zimmetinde mütekarrir ve ma‘kūdun-aleyh olan üç yüz esedî guruş mehir ile cihet-i deyn-i şer‘îden hakkım olan üç yüz esedî guruş ki cem‘an altı yüz esedî guruşu vasiyy-i merkūm Diyafle’den mukaddemâ taleb ve da‘vâ ettiğimde ol dahi inkâr etmeğin mukaddemâ huzûr-ı hâkimü’ş-şer‘de vasiyy-i mezbûr muvâcehesinde isbât ve terekeden edâsına hükm olundukdan sonra vasiyy-i mezbûr meblağ-ı mezbûru edâdan imtinâ‘ etmekle beynimizde münâza‘ât-ı kesîre vakı‘a olmuşidi el-hâletü hâzihî beynimizde muslihûn tavassut edip meblağ-ı mezbûr altı yüz esedî guruşdan vasiyy-i mezbûr ile beynimizde dört yüz elli esedî guruş üzerine inşâ-i akd-i sulh ettiklerinde ben dahi sulh-i mezbûru kabûl ve bedel-i sulh olan meblağ-ı mezbûr dört yüz elli esedî guruşu vasiyy-i mezbûr Diyafle yedinden tamâmen ahz u kabz edip mâ‘adâdan sagīretân-ı mezbûretânı ibrâ-i âm ile ibrâ ve iskāt eyledim dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’r-râbi‘ aşer min Cumâdelâhire li sene seb‘a ve seb‘în ve elf. Şuhûdü’l-hâl: Es-Sâbikūn.