Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 228 Hüküm no: 253 Orijinal metin no: [47a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hacı Ali b. Ramazan’ın vefât eden zevcesi Âişe Hâtun bt. Mahmud’un mirasından hissesine düşeni kızı Âişe’ye hibe ettiği Husûs-ı âti’l-beyânın mahallinde ketb ü tahrîr olunması iltimâs olunmağın cânib-i şer‘-i kavîmden mevlânâ Hidâyetullah Efendi irsâl olunup ol dahi zeyl-i kitâbda mastûrü’l-esâmî olan müslimîn ile medîne-i Ebâ Eyyûb-i Ensârî -radiye anhu Rabbühü’l-Bârî- mahallâtından Evlice Baba mahallesinde sâkin el-Hâc Ali b. Ramazan nâm kimesnenin menziline varıp akd-i meclis-i şer‘-i şerîf eylediklerinde menzil-i mezbûrda sâkine iken bundan akdem fevt olan Âişe Hâtun bt. el-Hâc Mahmud’un verâseti zevc-i metrûkü mezbûr el-Hâc Ali’ye ve sadriye kebîre kızı Âişe nâm bikr-i bâliğaya ve babası mezbûr el-Hâc Mahmud’a münhasıra olduğu şer‘an müte‘ayyin ve mütebeyyin oldukdan sonra müşârün-ileyh el-Hâc Mahmud meclis-i şer‘-i hatîr-i lâzımü’t-tevkīrde bint-i sulbiyesi işbu bâ‘isetü’l-kitâb mezbûre Âişe mahzarında bi-tav‘ihî ikrâr ve takrîr-i kelâm edip sulbiye kızım müteveffât-ı mezkûre Âmine Hâtun’un muhallefâtı tahrîr ve tahmîn olundukda ber mûceb-i defter-i müfredât yirmi iki akçeye bâliğ olup meblağ-ı mezbûrdan irs-i şer‘î ile bana intikāl eden beş bin beş yüz cedîd ceyyid râyic fi’l-vakt akçe hakkımı hâlen bint-i sulbiyem mezbûre Âişe’ye hibe-i sahîha-i şer‘iyye ile hibe ve temlîk ve teslîm ve ol dahi meclis-i hibede ittihâb ve kabz ve temellük ve tesellüm eyledi. Ba‘de’l-yevm meblağ-ı mersûmu merkūme Âişe’nin mâl-ı mevhûbudur keyfe mâ teşâ’ve hasbe mâ türîd mutasarrıfa olsun dedikde mukırr-ı mezbûrun minvâl-i muharrer üzre cârî ve sâdır olan ikrâr ve takrîrini el-mukarru lehü’l-mezbûre [47b ] Âişe bi’l-muvâcehe tasdîk ettikden sonra vâki‘ hâli mevlânâ-yı mezbûr mahallinde tahrîr ba‘dehû gelip meclis-i şer‘de alâ vukū‘ihî haber vermeğin mâ vaka‘a bi’t-taleb ketb olundu. Hurrire fi’l-yevmi’r-râbi‘ ve’l-ışrîn min Cumâdelûlâ li sene erba‘a ve hamsîn ve elf. Şuhûdü’l-hâl: Halil Çelebi b. Mustafa, Mahmud Efendi b. Mehmed el-İmâm, Ömer Halîfe b. Musa el-Müezzin, İsâ Beşe b. Mustafa, Ali Dede b. İlyas, Şaban Halîfe b. Kenan, Mehmed Çelebi b. Mustafa ve gayruhüm mine’l-huzzâr