Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 229 Hüküm no: 254 Orijinal metin no: [47b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Berber Mehmed Beşe b. Abdullah’ın mülk menzilini İbrahim Çelebi b. İsmail’e sattığı Medîne-i Ebâ Eyyûb-i Ensârî -radiye anhu Rabbühü’l-Bârî- mahallâtından Kiremitçi Süleyman mahallesinde sâkin Berber Mehmed Beşe b. Abdullah nâm kimesne meclis-i şer‘-i hatîr-i lâzımü’t-tevkīrde işbu râfi‘ü’l-kitâb İbrahim Çelebi b. İsmail mahzarında bi’t-tav‘ ve’r-rızâ ikrâr ve takrîr-i kelâm edip akd-i âtî sudûruna değin silk-i mülk-i sahîh ve sarîhimde münselik olan emlâkimden olup bundan akdem merkūm İbrahim Çelebi’den iştirâ eylediğim mahalle-i mezbûrede vâki‘ bir tarafdan merhûm İbrahim Ağa vakfı ile ba‘zan merhûm Behram Kethüdâ vakfı’na ve bir tarafdan Acemzâde Mehmed Çavuş vakf eylediği menzil ile ba‘zan muhzır Cafer Beşe mülküne ve bir tarafdan müşterî-i merkūm İbrahim Çelebi sâkin olduğu Haremeyn-i şerîfeyn vakfı olan menzile ve bir tarafdan Hüseyin Paşa vâlidesi Emine Hâtun mülküne müntehî iki bâb fevkānî beyti ve iki sofayı ve iki bâb tahtânî beyti ve iki sofayı ve zât-ı eşcâr-ı müsmire ve gayr-ı müsmireyi muhtevî bahçeyi ve arz-ı hâliyeyi ve muhavvatayı ve havluyu ve kenîfi müştemil mülk menzili cemî‘ tevâbi‘ ve levâhıkı ve kâffe-i menâfi‘ ve merâfıkı ile merkūm İbrahim Çelebi’ye yirmi iki bin sekiz yüz ceyyid cedîd fıddî râyic fi’l-vakt akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm ve ol dahi vech-i muharrer üzre iştirâ ve tesellüm ettikden sonra semen-i mezbûrü’n-na‘t yirmi iki bin sekiz yüz akçeyi yedinden bi’t-tamâm ve’l-kemâl ahz u kabz eyledim ba‘de’l-yevm mârrü’z-zikr menzil merkūm İbrahim Çelebi’nin mülk-i müşterâ-yı sahîh ve sarîhidir keyfe mâ yeşâ’ ve yürîd mutasarrıf olsun dedikde mukırr-ı mezbûrun ber vech-i mübeyyen cârî ve sâdır olan ikrâr ve takrîrini el-mukarru lehü’l-mezbûr bi’l-muvâcehe tasdîk ve bi’l-müşâfehe tahkīk etmeğin mâ hüve’l-vâki‘ bi’t-taleb ketb ve imlâ olundu. Tahrîren fi’l-yevmi’r-râbi‘ ve’l-ışrîn min Cumâdelûlâ li sene erba‘a ve hamsîn ve elf. Şuhûdü’l-hâl: Fahrü’l-akrân Ahmed Çelebi b. Mehmed, Selim Beşe b. Veli er-Râcil, el-Hâc Abdullah b. İbrahim, Mustafa Beşe er-Râcil, Baba Süleyman b. Turgud, İbrahim Çelebi min huddâm, Hüseyin Beşe b. Mahmud min huddâm, Hüseyin Çelebi b. Ali, Bayram Dede ve gayruhüm