Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 230 Hüküm no: 255 Orijinal metin no: [47b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yani v. Hristodolo’nun evini Büyük Espelinor Manastırı Vakfı’na sattığı ve bedelini tahsil ettiği Vilâyet-i Rumeli’nde Mora sancağında Balyabadra [Ballıbadra] kazâsına tâbi‘ kasaba-i Balyabadra mahallâtından Ayapraşkevi mahallesinde sâkin Yani v. Hristodolo nâm zimmî meclis-i şer‘-i hatîr-i lâzımü’t-tevkīrde Kalavrita kazâsına tâbi‘ Büyük Espelinor demekle ma‘rûf manastır vakfına kāimmakām-ı mütevellî olan işbu hâmilü’l-kitâb Bermayo v. Nakdaryor nâm …? râhib muvâcehesinde bi’t-tav‘i’s-sâf ikrâr-ı tâm ve takrîr-i kelâm edip akd-i âtî sudûruna değin silk-i mülkümde münselik olan emlâkimden mahalle-i mezbûrede vâki‘ bir tarafdan Polisedo v. Tatoni mülküne ve bir tarafdan İstati Yanan mülküne ve bir tarafdan Paşuhli tarlasına ve bir tarafdan tarîk-i âma müntehî iki fevkānî ve bir tahtânî beyti ve havluyu [müştemil] mülk menzilimi cümle tevâbi‘ ve levâhıkı ve âmme-i menâfi‘i ve merâfıkı ile merkūm Bermayo’ya mezbûrü’n-na‘t mâl-ı vakf-ı mezbûr ile altmış kıt‘a riyâlî guruşa bey‘-i bâtt-ı sahîh-i şer‘î ile bey‘ ve kabz-ı semen edip mebî‘-i mezkûru mahallinde kabza müşterî-i merkūmu taslît eyledim, ba‘de’l-yevm menzil-i mahdûd-ı merkūm mesfûr Bermayo’nun mülk-i müşterâ-yı sarîhidir keyfe mâ yeşâ’ ve hasbe mâ yürîd mutasarrıf olsun dedikde mukırr-ı mezbûrun vech-i mübeyyen üzre cârî ve sâdır olan ikrâr ve takrîrini el-mukarru lehü’l-mezbûr Bermayo bi’l-muvâcehe tasdîk edicek mâ hüve’l-vâki‘ gıbbe’l-ibtigā sebt olundu. Hurrire fi’l-yevmi’s-sânî ve’l-ışrîn min Cumâdelûlâ li sene erba‘a ve hamsîn ve elf. Şuhûdü’l-hâl: Fahrü’l-kuzâ[t] İbrahim Efendi, Ahmed Çelebi b. Abdullah, Mustafa Beşe b. Mehmed, Ali Beşe b. Mustafa, Kaniloviz [v.] Filo, Sohari [v.] İspilyot, Hristodolo [v.] Pabuci, Angeli [v.] Pabuci, Panayot [v.] Pabuci ve gayruhüm