Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 235 Hüküm no: 261 Orijinal metin no: [49a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Rahime Hâtun bt. Kasım’ın Sâime Hâtun bt. Bayram’a borcu olduğu ve karşılığında menzilini rehin olarak verdiği Medîne-i Ebâ Eyyûb-i Ensârî -radiye anhu Rabbühü’l-Bârî- mahallâtından Aşçıbaşı mahallesi sâkinelerinden Rahime Hâtun bt. Kasım taraf[ın]dan husûs-ı câi’z-zikri ikrâra vekîl olup fahrü’l-a‘yân İbrahim Subaşı b. Ali ve Mustafa Beşe b. Mehmed el-Muhtesib şehâdetleri [ile] hâsım mahzarında vekâleti sâbite olan Mustafa b. Hüseyin meclis-i şer‘-i şerîf-i lâzımü’t-tevkīr ve’t-teşrîfde işbu râfi‘atü’l-kitâb müvekkile-i mezbûrenin vâlidesi Sâime Hâtun bt. Bayram muvâcehesinde bi’l-vekâle ikrâr ve takrîr-i kelâm edip müvekkile-i mezbûre Rahime’nin zimmetinde mütekarrir lâzımü’l-edâ ve vâcibü’l-kazâ karz-ı şer‘îden mersûme Sâime’ye on beş bin cedîd ceyyid akçe deyni olup meblağ-ı mezbûr mukābelesinde mahalle-i mezbûrede vâki‘ bir tarafdan Mehmed b. Hasan mülkü ve bir tarafdan merhûme Âişe Hâtun vakfı olan menzil ve tarafeynden tarîk-i hâs ve âm ile mahdûd iki bâb fevkānî odayı ve altında ahırı ve su kuyusunu ve kenîfi müştemil mülk menzilini mezbûre Sâime’ye rehin vaz‘ ve teslîm edip ol dahi ber vech-i meşrûh mezbûru meblağ-ı mezbûra rehin olmak üzre tesellüm ve kabûl eyledi dedikde gıbbe’t-tasdîki’ş-şer‘î mâ vaka‘a bi’t-taleb ketb ve terkīm [olundu]. Tahrîren fi’l-yevmi’l-âşir min Cumâdelâhire li sene erba‘a ve hamsîn ve elf. Şuhûdü’l-hâl: Fahrü’l-emsâl Ali Bey b. Mehmed subaşı der medîne-i Hazret-i Eyyûb, Ali Beşe b. Mustafa, Musa b. Mehmed, Baba Süleyman b. Turgud ve gayruhüm