Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 235 Hüküm no: 262 Orijinal metin no: [49a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Nikola v. Yorgi’nin mülk menzilini Nikola v. Mihal’e sattığı Vilâyet-i Rumeli’nde İnebahtı sancağında Gerbeniş kazâsına tâbi‘ Paparoş nâm karye sâkinlerinden Nikola v. Yorgi nâm zimmî meclis-i şer‘-i hatîr-i lâzımü’t-tevkīrde işbu hâmil-i hâze’l-kitâb Nikola v. Mihal nâm zimmî muvâcehesinde bi’t-tav‘i’s-sâf ikrâr ve i‘tirâf edip akd-i âtî sudûruna değin silk-i mülk-i sahîh ve sarîhimde münselik emlâkimden karye-i mezbûrede vâki‘ bir tarafdan Yorgi v. Nikola ve etrâf-ı selâseden tarîk-i âm ile mahdûd bir bâb tahtânî beyti ve eşcâr-ı müsmire ve gayr-ı müsmireyi hâviye muhavvatayı müştemil olan mülk menzilimi bi-cümleti’t-tevâbi‘ ve’l-levâhık ve kâffeti’l-hukūk ve’l-merâfık mezbûr Nikola’ya altı bin nakd-i râyic fi’l-vakt fıddî akçeye bey‘-i bâtt-ı sahîh-i şer‘î ile bey‘ ol dahi ber vech-i meşrûh iştirâ ve tesellüm eyledikden sonra semen-i mezbûrü’n-na‘t altı bin akçeyi yedinden ahz u kabz edip menzil-i mezbûru mahallinde kabz ve tesellüme müşterî-i merkūm Nikola’yı taslît eyledim ba‘de’l-yevm menzil-i mârrü’z-zikr mezbûr Nikola’nın mülk-i müşterâsıdır keyfe mâ yeşâ’ ve yahtâr mutasarrıf olsun dedikde gıbbe’t-tasdîki’ş-şer‘î mâ vaka‘a bi’t-taleb ketb ve terkīm olundu. Tahrîren fi’l-yevmi’l-âşir min Cumâdelâhire li sene erba‘a ve hamsîn ve elf. Şuhûdü’l-hâl: Mustafa Beşe b. Mehmed el-Muhtesib, Ali Beşe b. Mustafa, Mustafa Beşe b. Veli el-Muhzır, Dimitri v. Yorgi, Yorgi v. Andriye, Panes v. Şenat, İsteryano v. Nikola, Şiro v. Nikola, Dimitri, Mihal