Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 236 Hüküm no: 263 Orijinal metin no: [49a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Receb b. Uzun Ali’nin boşadığı Rahime bt. Kurd’dan olan kızı Âişe’ye nafaka tayin edildiği Mahmiye-i İstanbul hısnı ebvâbından Eğrikapı dâhilinde Avcı Bey mahallesinde sâkine Kıbtî tâifesinden işbu hâmilet-i hâze’l-kitâb Âişe bt. Receb nâm bikr-i bâliğa meclis-i şer‘-i hatîr-i lâzımü’t-tevkīrde takrîr-i kelâm ve ta‘bîr ani’l-merâm edip hâlen vâlidem ve mürebbiyem olup hâzıratün bi’l-meclis olan Rahime bt. Kurd nâm Kıbtiye hâtunu babam mezbûr Receb b. Uzun Ali nâm Kıbtî tatlîk ve âharı tezvîc etmekle beynimizde müfârakat vâki‘ olmuşdur el-hâletü hâzihî ber muktezâ-yı şer‘-i kavîm babam malından nafaka ve kisve ve sâir mühimmât-ı lâzıme için yevmî üçer akçe takdîr olunmasını taleb ederim dedikde hâkim-i muvakki‘u’l-kitâb -tûbâ lehû ve hüsnü me’âb- vech-i meşrûh üzre mesfûre Âişe’ye babası merkūm Receb malından nafaka ve kisve ve sâir harc-ı lâzıme için târih-i kitâbdan yevmî üçer akçe nafaka takdîr edip inde’l-ihtiyâc istidâneye ve vakt-i zaferde rücû‘a mezbûre Âişe’ye izin vermeğin mâ hüve’l-vâki‘ gıbbe’l-ibtigā sebt ve imlâ olundu. Hurrire fi’l-yevmi’r-râbi‘ min Cumâdelâhire li sene erba‘a ve hamsîn ve elf. Şuhûdü’l-hâl: Mustafa Beşe b. Abdülmennân zâviye-nişîn, Hüseyin Çelebi b. Ali min huddâm, Mustafa Çelebi b. Veli, Ahmed Çelebi b. Mehmed sâkin-i Emir Buhârî, Bayram Sofu b. Mehmed, Mustafa Beşe el-Muhtesib, Musa b. Mehmed ve gayruhüm