Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 236 Hüküm no: 264 Orijinal metin no: [49a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hüseyin Çelebi b. Ömer’in Niko v. Yani ile kardeşi Kiro’daki alacağının bir kısmının vekili olan kardeşi Ali Bey tarafından tahsil edildiği ve kalanından borçlular ile kefîllerinin zimmetlerinin ibrâ edildiği Vilâyet-i Rumeli’nde nefs-i kasaba-i Delvine’de sâkin Hüseyin Çelebi b. Ömer tarafından meblağ-ı âti’l-beyânı ahz u kabz ve îsâle ve lede’l-hükkâm mürâfa‘a ve müsâlahaya vekîl olup hasm-ı câhid-i şer‘î mahzarında bimâ hüve nehcü’ş-şer‘î şer‘an vekâleti sâbite olan müvekkil-i merkūmun li ebeveyn karındaşı Ali Bey b. Ömer meclis-i şer‘-i hatîr-i lâzımü’t-tevkīrde işbu râfi‘ü’l-kitâb Niko v. Yani nâm zimmî mahzarında bi’t-tav‘i’s-sâf ikrâr ve i‘tirâf edip mezbûr Niko ve gāib ani’l-meclis olan karındaşı Kiro nâm zimmî zimmetlerinde karındaşım merkūm Hüseyin Çelebi’nin karz-ı şer‘îden üç bin altı yüz akçe hakkı olup vekâlet-i mahkiyem hasebiyle meblağ-ı mezbûrdan üç bin dört yüz akçesini mezbûr Niko yedinden ahz u kabz edip mâ‘adâsı olan iki yüz akçeden zimmetlerini ibrâ-i âm ile ibrâ ve iskāt eyledim eyledikden sonra meblağ-ı mezbûrun cümlesine emr ve kabûlü hâvî kefâlet ile kefîl olan Menkosa v. Niko ve Estoro v. Niko ve Zodi v. Verana ve Yani v. Maki ve Marko v. Kiro nâm zimmîlerin zimmetlerini dahi ibrâ eyledikden sonra mukırr-ı mezbûrun bi’l-vekâle cârî ve sâdır olan ikrâr ve takrîrini el-mukarru lehü’l-mezbûr bi’l-muvâcehe tasdîk edicek mâ hüve’l-vâki‘ bi’t-taleb ketb olundu. Tahrîren fi’l-yevmi’t-tâsi‘ min Cumâdelâhire li sene erba‘a ve hamsîn ve elf. Şuhûdü’l-hâl: Mustafa Beşe el-Muhtesib, Ali Beşe Serbölük, Mustafa Çelebi b. Veli, İbrahim Çelebi min huddâm, Bayram Sofu