Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 237 Hüküm no: 265 Orijinal metin no: [49b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İstati v. Yorgi’nin tasarrufundaki tarlayı Hristo v. İskarlet’e devrettiği Vilâyet-i Rumeli’nde Yenişehir kazâsı müzâfâtından Kuhistân nâhiyesine tâbi‘ Veraha nâm karye sükkânından İstati v. Yorgi nâm zimmî meclis-i şer‘-i hatîr-i lâzımü’t-tevkīrde işbu râfi‘ü’l-kitâb Hristo v. İskarlet nâm zimmî muvâcehesinde bi’t-tav‘ ve’r-rızâ ikrâr ve takrîr-i kelâm edip tefvîz-i âtî sudûruna değin taht-ı tasarrufumda olan arâziden karye-i mezbûre kurbunda Istıranca demekle ma‘rûf mevzi‘de vâki‘ bir tarafdan Durmuş b. Abdullah tarlasına ve bir tarafdan Nikola v. İsteryano tarlasına ve bir tarafdan Dimitri v. Zahımi tarlasına ve bir tarafdan ormana müntehî diyârımız keyli ile tahmînen dört keyl tohum isti‘âb eder bir kıt‘a tarlanın hakk-ı tasarrufunu sâhib-i arz ma‘rifetiyle merkūm Hristo’ya cedîd ve ceyyid râyic fi’l-vakt bin iki yüz elli akçeye tefvîz ve ol dahi vech-i mübeyyen üzre tefevvuz ve kabûl ettikden sonra mukābele-i tefvîzde olan bin iki yüz elli mezbûrü’n-na‘t akçeyi mezkûr Yorgi yedinden bi’t-tamâm ve’l-kemâl ahz u kabz edip müfavvaz-ı mezkûru mahallinde tasarrufa merkūm Hristo’yu taslît eyledim emsâli tasarrufu gibi mutasarrıf olsun dedikde mukırr-ı mezbûrun minvâl-i muharrer üzre cârî ve sâdır olan ikrârını mersûm Hristo vicâhen tasdîk ve şifâhen tahkīk eylemeğin işbu hurûf bi’t-taleb ketb ve terkīm olundu. Tahrîren fi’l-yevmi’t-tâsi‘ min Cumâdelâhire li sene erba‘a ve hamsîn ve elf. Şuhûdü’l-hâl: Ali Beşe b. Mustafa min huddâm, Mustafa Beşe b. Veli min huddâm, Baba Süleyman [b.] Turgud, Hristo v. Lagori, Dimitri v. Kosta, Dimitri v. Yorgi, İsteryano v. Nikola, Yani v. Rizo, Manol v. İstado, Dimo v. Kamino, Nikola v. İsteryano ve gayruhüm mine’l-hâzırîn