Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 238 Hüküm no: 266 Orijinal metin no: [49b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Andon v. Kiryaki’nin Todori v. Yorgi’ye iki mülk bağını sattığı ve tasarrufundaki yirmi tarlayı devrettiği Vilâyet-i Rumeli’nde livâ-i Mora’da Traboliçe kazâsına tâbi‘ Bazanik nâm karyeden Andron v. Kiryaki nâm zimmî meclis-i şer‘-i hatîr-i lâzımü’t-tevkīrde işbu hâmil-i hâze’l-kitâb Todori v. Yorgi nâm zimmî muvâcehesinde bi’t-tav‘i’s-sâf ikrâr ve takrîr-i kelâm edip akd-i âtî sudûruna değin silk-i mülkümde münselik olan emlâkimden karye-i mezbûre bağları dâhilinde vâki‘ bir tarafdan Şenadinos v. Yani bağına ve bir tarafdan Yorgi v. Berber bağına ve bir tarafdan Yano v. Kosta bağına ve bir tarafdan tarîk-i âma müntehî ve mahdûd tahmînen bir dönüm bir kıt‘a bağ ve yine bir tarafdan Kostantin v. Kokano bağına ve bir tarafdan Mustafa Beşe b. Ali bağına ve bir tarafdan Kosta v. Yani bağına ve bir tarafdan tarîk-i âma müntehî tahmînen buçuk dönüm bir kıt‘a bağ cümle iki kıt‘a mülk bağı cümle tevâbi‘ ve levâhıkı ve âmme-i menâfi‘ ve merâfıkı ile merkūm Todori’ye bin fıddî cedîd ceyyid râyic fi’l-vakt akçeye bey‘-i bâtt-ı sahîh-i şer‘î ile bey‘ ve kabz-ı semen edip zikr olunan bağları mahallinde kabza müşterî-i merkūmu taslît eylediğimden sonra yine karye-i mezbûre sınırı dâhilinde vâki‘ inde ahâliyi’d-diyâr her biri ma‘lûmü’l-hudûd ve’l-mikdâr tahmînen yirmi keyl tohum isti‘âb eder yirmi kıt‘a tarlanın hakk-ı tasarrufunu sâhib-i arz ma‘rifetiyle merkūm Todori’ye üç bin nakd-i mezbûrü’n-na‘t akçeye tefvîz edip ol dahi vech-i mübeyyen üzre tefevvuz ve kabûl ettikden sonra mukābele-i bey‘ ve tefvîzde olan dört bin akçeyi mersûm Todori yedinden bi’t-tamâm ve’l-kemâl ahz u kabz eyledim ba‘de’l-yevm mârrü’z-zikr iki kıt‘a bağ mersûm Todori’nin mülk-i müşterâ-yı sarîhidir ve sâlifü’l-beyân yirmi kıt‘a tarla dahi mersûmundur sâir emsâli tasarrufu gibi mutasarrıf olsun dedikde mukırr-ı mezbûrun minvâl-i muharrer üzre cârî ve sâdır olan ikrâr ve takrîrini el-mukarru lehü’l-mezbûr Todori bi’l-muvâcehe tasdîk edicek mâ hüve’l-vâki‘ bi’t-taleb ketb ü tahrîr olundu. Hurrire fi’l-yevmi’l-âşir min Cumâdelâhire li sene erba‘a ve hamsîn ve elf. Şuhûdü’l-hâl: Mustafa Beşe el-Muhtesib, Ali Beşe el-Muhzır, Baba Süleyman b. Turgud, Bayram Sofu, Yani v. Dimo, Petro v. Trandafilo, Petro v. Yorgi, Panayot v. Yani, Nikola v. Yorgi, Yorgi v. Dimo ve gayruhüm mine’l-huzzâr