Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 238 Hüküm no: 267 Orijinal metin no: [49b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Varto v. Yani’nin tasarrufundaki tarlayı Kirko v. Niko’ya devrettiği Vilâyet-i Rumeli’nde Ergirikasrı kazâsına tâbi‘ Vaniste nâm karyede sâkin Varto v. Yani meclis-i şer‘-i şerîf ve mahfil-i dîn-i münîfde işbu râfi‘ü’l-kitâb Kirko v. Niko nâm zimmî muvâcehesinde bi’t-tav‘ ve’r-rızâ ikrâr ve takrîr-i kelâm edip karye-i mezbûre sınırı dâhilinde vâki‘ bir tarafdan Nikoci nâm zimmî tarlasına ve bir tarafdan Yani v. Keso nâm zimmî tarlasına ve bir tarafdan manastır ve bir tarafdan tarîk-i âma müntehî Mesonese nâm mevzi‘de tahmînen dört dönüm bir kıt‘a tarlamı sâhib-i arz ma‘rifetiyle mezbûr Kirko’ya iki bin kırk cedîd ceyyid fıddî râyic fi’l-vakt akçeye tasarrufunu tefvîz edip ol dahi vech-i muharrer üzre tefevvuz ve kabûl ettikden sonra mukābele-i tefvîzde olan mezbûrü’n-na‘t iki bin kırk akçeyi yedinden bi’t-tamâm ve’l-kemâl ahz u kabz edip sâlifü’z-zikr tarlayı mahallinde kabz ve tasarrufa merkūm Kirko’yu taslît eyledim ba‘de’l-yevm mârrü’z-zikr tarla mezbûr Kirko’nun mülk-i müfavvazıdır keyfe mâ yeşâ’ ve yürîd mutasarrıf olsun dedikde mukırr-ı mezbûrun ber vech-i mübeyyen cârî ve sâdır olan ikrâr ve takrîrini el-mukarru lehü’l-mezbûr bi’l-muvâcehe tasdîk ve bi’l-müşâfehe tahkīk etmeğin mâ hüve’l-vâki‘ bi’t-taleb ketb olundu. Tahrîren fi’l-yevmi’l-hâdî aşer min Cumâdelâhire li sene erba‘a ve hamsîn ve elf. Şuhûdü’l-hâl: Papa Yorgi v. Kolo, Panko v. Kirko, Dimo v. Yani, Yorgi v. Doma, Yorgo v. Kara Yani, Panko v. İskevi, Sirmo v. Yani, Todori v. Yani, Hristo v. Koni ve gayruhüm mine’l-huzzâr