Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 239 Hüküm no: 268 Orijinal metin no: [50a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hatice bt. Mehmed’in tasarrufundaki vakıf evin süknâsını Mehmed Çelebi b. Mehmed’e ferâğ ettiği Medîne-i Ebâ Eyyûb-i Ensârî -radiye anhu Rabbühü’l-Bârî- mahallâtından Aşçıbaşı mahallesinde sâkine Hatice bt. Mehmed nâm hâtun meclis-i şer‘-i şerîfde işbu râfi‘ü’l-kitâb Mehmed Çelebi b. Mehmed mahzarında ikrâr ve takrîr-i kelâm edip mahalle-i mezbûrede vâki‘ bir tarafdan Mihriban Hâtun vakfı ve bir tarafdan Hasan Çelebi mülkü ve bir tarafdan İsmail Çelebi mülkü ve bir tarafdan tarîk-i hâs ile mahdûd iki bâb tahtânî beyti ve bi’r-i mâyı ve kenîfi ve sahayı müştemil süknâsı zükûr ve inâsdan olup sulehâdan her rûz bir sû[re]-i Mülk kırâatine kādir olan bir kimesneye mevkūf olan menzil bin otuz yedi senesi Muharremü’l-harâmında mahlûl olup sene-i mezbûrede hâkimü’ş-şer‘ olan Abdullah Efendi menzil-i mezbûru bana tevcîh ve yedime hüccet-i şer‘iyye verip ilâ hâze’l-yevm süknâsı benim tasarrufumda idi el-hâletü hâzihî ben dahi hakk-ı süknâmı hüsn-i ihtiyârım ile minvâl-i muharrer üzre hizmet-i lâzımesini edâ etmek şartı üzre merkūm Mehmed Çelebi’ye fâriğ oldum dedikde mukırr-ı mezbûrenin ber vech-i mübeyyen cârî ve sâdır olan ikrârını el-mukarru lehü’l-mezbûr Mehmed Çelebi bi’l-muvâcehe tasdîk ve bi’l-müşâfehe tahkīk etmeğin mâ hüve’l-vâki‘ bi’t-taleb ketb ve terkīm olundu. Hurrire fi’l-yevmi’t-tâsi‘ min Cumâdelâhire li sene erba‘a ve hamsîn ve elf. Şuhûdü’l-hâl: İsmail Çelebi b. Resul, Veli Çelebi b. İsâ, Halil Çelebi b. Hüdâverdi, Halil b. Mehmed, Mustafa b. Mehmed, Mehmed b. Hızır, Ömer b. Cafer, Musa b. Mehmed, Hüseyin Çelebi b. Ali